'Aggression Continuum'

Azken urteak izan dira bereziki beldurgarriak. Dino Cazares gitarristaren eta Burton C. Bell abeslariaren arteko liskarrek kolokan jarri zuten Fear Factory talde estatubatuarra. 1980ko hamarkada bukaeran elkarrekin sortu zuten makinak hainbat matxura izan ditu urteen joan etorrian. Disko onak eta ez hain onak dituzte, eta espero baino gehiago atzeratu den lan berriaren inguruko aurreikuspenak askotarikoak ziren. Aggression Continuum diskoa da Cazares eta C. Bell musikarien arteko harremanaren bukaera. Iaz utzi zuen banda abeslariak, nahiz eta bere ahotsa mantendu duten. Lana, berriz, ezusteko on bat da. Muturreko metal industrialaren sustatzaile nagusiek distopia apokaliptiko interesgarria irudikatu dute kantu sorta apurtzailearekin. Beraz, adiorik ez.