111 Akademiak Lizarralde saritu du

Atzo jaso zuen Pello Lizarraldek 111 Akademiaren XXV. saria, Villabona-Amasako Hika txakolindegian (Gipuzkoa), Argiantza eleberriagatik. 202 akademiakideren artean 117k hartu dute parte 2020ko sariduna aukeratzeko bozketan, eta Lizarraldek Joxean Agirreren Nobela errealista bat eleberria izan du lehiakide azken bueltan. Lehen aldia da 111 Akademiak haren lan bat saritu duela. 1980ko hamarkadan girotu du Argiantza, eta bideogintzaren agerpenaren ostean zinemagintzak izaniko beherakadaren hasiera kontatu du liburuan.