Lillen (Frantzia) Series Mania jaialdia egin zuten martxoan, eta sari nagusia xakearen inguruko Rematch telesailak jaso zuen. Ostiralean, berriz, Canneseries jaialdia hasiko da. Zazpigarren urtea da Cannesen (Okzitania) nazioarteko jaialdi hori egiten dutena.
Zortzi telesail izango dira lehian Canneserieseko Sail Ofizialean: Dark Horse (Danimarka), Dummedag (Norvegia), Betinho: No Fio da Navalha (Brasil), Moresnet (Belgika, Herbehereak eta Alemania), Sablja (Serbia), Die Zweiflers (Alemania), To the Wonder (Txina) eta Això no és Suècia (Katalunia). Azken hori osorik ikus daiteke Hego Euskal Herrian, RTVE Play eta 3Cat doako plataformetan —elkarrizketak katalanez eta gaztelaniaz dira—.
Lehiaz kanpo, bestetik, honako telesail hauek proiektatuko dituzte: Terminal, Becoming Karl Lagerfeld, Fallout, Fiasco, Franklin eta Máxima.
Cannesen bertan, MIPTV nazioarteko azoka egingo dute datorren astean. Mundu osoko ekoizle eta banatzaileak bilduko dira bertan, eta tartean Euskal Herriko batzuk ere izango dira. Azoka hori datorren urtean Londresen egingo dutela iragarri dute egunotan.
