'TOPera!' saioa aurkeztuko du Iban Garatek bihar hasita ETB1en

Iban Garatek aurkeztuko duen saio berri bat hasiko da bihar ETB1 katean: TOPera!. Astelehenetik ostegunera emango dute, 21:00etatik 21:15era. Eta bertan Euskal Herriko alderik bitxienak erakutsiko dituzte ranking batean. Egunero TOP5 zerrenda bat ezagutuko dute ikus-entzuleek. Adibidez, zeintzuk diren Euskal Herriko eskulturarik bitxienak, etxerik deigarrienak, euskaldunok gehien abesten ditugun abestiak, txokorik zaharrenak edo gozorik gogokoenak.

«Euskaldunak nolakoak garen ezagutzeko era ezberdin eta zuzenago bat dakarkigu saio berriak», adierazi du ETBk. «Kaleko jendeak kontatuko baitu hori guztia». Euskaldunon ohiturak eta gustuak gainerako herrialdeen berdinak diren ere azalduko dute. Denborak aurrera joan ahala aldatu ote diren jakiteko ahalegina egingo dute, bide batez. «Norberak bere ondorioak atera ahalko ditu saioa ikusiz».