Espainiako RTVE talde publikoak katalanezko telebista kate jeneralista bat sortuko du: 2CAT. Berriki onartu du egitasmoa RTVEko administrazio kontseiluak, aho batez, eta lehen emankizunak irailaren 11n egingo dituzte. Kataluniako Diadarekin bat eginez, alegia. Urrian, berriz, programazio egonkorra eta ohiko emankizunak izango ditu kate berriak.
Albert Dalmau Kataluniako Generalitateko kontseilariak kanal berriaren inguruko hainbat xehetasun eman ditu Gemma Nierga kazetariaren Café d'ídees saioan: «Oso garrantzitsua da RTVEk kate berri bat izatea eguneko 24 orduetan katalanez emititzen. Hilabete honetan bertan, hitzarmen bat sinatuko dugu, egitasmoari egonkortasuna emateko. Buruan dugu hitzarmen hori hamabost urterako izango dela».
PSC alderdikoa da Dalmau, eta PSOE Espainiako Gobernuan egiten ari den lanaren alde mintzatu da: «Katalanezko kanalak Espainiako Gobernuaren ekimena erakusten du. Eta, aldi berean, erakusten du ulertzen duela Espainia herrialde plurala dela, eta hainbat hizkuntza hitz egiten direla bertan». Generalitateko ordezkariari iruditzen zaio 2CAT sortzea garrantzitsua izango dela hizkuntza katalanarentzat: «Katalana etorkizuneko hizkuntza izatea nahi baldin badugu, ikus-entzunezkoen sektorean presente egon dadin behar dugu».
RTVEk kate berriaren inguruko informazio gehiago zabaldu du, Dalmauren iragarpenaren ostean. «Kanal berriak begirada, ahots eta eduki berriei egingo die tokia», dio Espainiako talde publikoak. «Kanal jeneralista bat izango da, gertukoa izateko bokazioa edukiko duena, eta ikusgai jarriko duena Katalunia moderno eta askotariko bat, bere sustraiez harro dagoena». Udazkenean martxan izango da 2CAT.
Oriol Nulis Curull (Bartzelona, 1978) izango da 2CAT katearen zuzendaria. Hogei urte dira RTVEn lanean ari dela, eta 2021eko uztailetik 2023ko urrira Kataluniako RTVEren zuzendaria izan zen. Hainbat saio aurkeztu ditu, eta Kataluniako RTVEko albistegien zuzendari ere izan da.
Katalanezko kate berriko edukien arduraduna Laura Folguera (Bartzelona, 1975) izango da. 2023ko abendutik, La2 katearen zuzendari lanetan aritu da Folguera. Kazetaria da, eta hogei urtez aritu da Sant Cugateko RTVEko ekoizpen zentroan lanean.
Euskara Clanen?
RTVEk adierazi du «konprometituta» dagoela «Espainiako hizkuntza aniztasunarekin», baina hori katalanarekin bakarrik azaleratzen ari da. Euskarari eta galegoari dagokienez, bestelakoa da egoera.
Jose Pablo Lopez RTVEko presidenteak urtarrilean esan zuen Clan haurrentzako katea katalanez ere ikusi ahalko dela urtea amaitu aurretik, sistema dualaren bitartez —ikusleak gaztelaniazko edo katalanezko audioa aukeratu ahalko du—. «Euskarazko eta galegozko bertsioetan ere lanean ari gara. Kataluniako Generalitatea, Eusko Jaurlaritza eta Galiziako Xunta ari ziren hori eskatzen. Eta saiatuko gara 2025. urtean galegozko eta euskarazko bikoizketak ere txertatzen», adierazi zuen. Oraingoz, ez da halakorik, eta RTVEko presidenteak agerraldi berean aitortu zuen euskarak ez duela presentziarik TVEn. «2025. urteak aurrera egin ahala, egindako lanaren fruituak ikusiko dira katalanez, galegoz eta euskaraz. Prozesu bat hasiko dugu gure presentzia euskaraz zabaltzeko, gaur egun hutsala baita». Hutsala da, eta hala salatu du azkeneko bi urteetan Pantailak Euskaraz mugimenduak.
