Abisua izan zen joan den ostegunekoa. Eurovision musika jaialdirako bigarren finalerdiaren atarian, 10.000-12.000 lagun atera ziren kalera Malmon, Suedian, Israelen parte hartzea salatu eta Eurovisioni boikota egiteko eskatuz, Israel Gazan egiten ari den erasoa tarteko. Aurretik, asteartean, lehen finalerdian, eskumuturrean zapi palestinar bat zuela agertu zen oholtzan Eric Saade kantari suediarra —arbaso palestinarrak ditu—. Eta larunbatean piztu zen giroa.
Piztu, areto barruan, batetik, antolakuntzak lehiatik kanpo utzi zuelako Joost Klein herbeheretarra, produkzioko kide batekin izandako «gorabehera» bat tarteko. Irlanda, Suitza eta Greziako ordezkariek ere boikot mehatxua egin zuten azken entseguan; eta Norvegia eta Finlandiako bozeramaileek uko egin zioten puntuak emateari. Eta piztu, aretoaren atarian, bestetik, protestak izan zirelako larunbatean ere, eta poliziek hainbat lagun atxilotu zituztelako, Greta Thunberg aktibista suediarra tartean.
Barruan, Eden Golan israeldarraren aurkako oihuak nagusitu ziren hura kantuan hasi zenean. Suitzak irabazi du aurtengo Eurovision jaialdia. Bosgarren amaitu zuen Israelek.
