Iker Gurrutxaga esatariak aurkezten du Musikharia saioa Naiz irratian, eta musika programa hori milagarren atalera iritsi da jada. Datorren asteartean, hilak 25, ospakizun berezia egingo dute Donostiako Dabadaba aretoan. Ohiko kolaboratzaileek parte hartuko dute ekitaldian, eta, horrez gain, honako bikote hauek jarriko dituzte kantuan oholtza gainean: Olatz Salvador eta Olaia Inziarte; Izaro Andres eta Gartxot Unsain; eta Lide Hernando eta Iker Lauroba.
Milagarren atala saioko komunitatearekin ospatu nahi dute. Saio berezi hori 19:00etan hasiko da; 18:30ean irekiko dituzte ateak.
Gainera, Naiz irratiko arduradunek ekitaldi hori baliatuko dute egitasmo berri bat aurkezteko.
Musikharia irratsaioaren atalak Naiz irratiaren webgunean ere entzun daitezke, noiznahi. Atal bakoitzak testu bat ere badakar, Gurrutxagak berak idatzia, programaren edukia laburbiltzen duena. Elkarrizketatzen dituen musikarien eta taldeen kantuen zerrendak egiten ditu, gainera.
