Lazkao Txikik Super8an grabatutako filmak 'Hitzetik hortzera' saioan

Ordutegi berriarekin hasiko du denboraldia ETB1eko Hitzetik hortzera bertsolaritza saioak, igandean. Hemendik aurrera 22:30ean emango dute.

Batetik, ikus-entzunezko dokumentu berezi batzuez gozatu ahalko dute ikusleek: Lazkao Txikik Super8an grabatutako film argitaragabeak. Asier Altuna zinemagileak Abaliñe baserrian deskubritu zituen film horiek, Bertsolari dokumentalerako lanean ari zela. Familiak bazekien Lazkao Txikik zinema kamera bat zuela eta harekin filmaketak egin ohi zituela, baina ez zekiten bobina haiek zer gordetzen zuten. Lazkao Txikik bere burua filmatu zuen zinta horietako batzuetan, mendian, Plin bere txakurrarekin batera.

Igande honetako saioan, bestetik, Ainhoa Aranburu eta Marc Febrer gonbidatuko dituzte. Aranburuk euskaldun berrientzako bertso eskola bat antolatu zuen Iruñeko Hizkuntz Eskolan duela lau urte. Ikasle horietako bat da Marc Febrer, Menorcan jaiotakoa. Gipuzkoako Bertsolari Txapelketako final-laurdenen laburpena ere egingo dute.

Aurten, Hitzetik hortzera larunbatetatik www.eitb.com-en izango da ikusgai.