Ekainaren 23an beteko dira 25 urte Kronika euskal egunkaria argitaratzen hasi zirenetik. Hernanin (Gipuzkoa) sortu zuten euskarazko tokiko komunikabide hori, eta, gaur egun, herri horretako albisteak emateaz gain, Astigarragako (Gipuzkoa), Ereñotzuko (Hernani), eta Arano eta Goizuetako (Nafarroa) gertakizunen berri ere ematen du. 25. urteurrena ospatzeko, hainbat ekitaldi antolatu dituzte: lehen biak bihar bertan egingo dituzte.
Aritz Zerainek, Eñaut Agirrek eta Leire Goñik Kronika-ren 25 urteen errepasoa egingo dute bihar mahai inguru batean. Hernaniko Biteri kultur etxeko areto nagusian izango da, 18:30ean. Hiru solaskideetako bakoitzak etapa batean egin zuen lan Kronika-n, eta, beraz, ikuspegi zabala bilduko dute solasaldian.
Hitzaldia amaitzen denean, 19:30 inguruan, 25 urte kaleko berri ematen erakusketa inauguratuko dute Biterin bertan —martxoaren 7ra arte izango da ikusgai—. Erakusketa horretan, hasierako urteetako argazki zaharrak eta egunkaritik pasatu diren lantaldeen argazkiak ikusi ahalko dira. Ibilbide kronologiko bat egingo dute, azalen, argazkien eta azalpenen bitartez. Abenduaren 28an, hau da, Inozente egunean argitaratutako aleak ere izango dira ikusgai.
Apirilaren 4an, bestalde, Kronika-ri buruzko bertso saio bat egingo dute Astigarragako Erribera kulturgunean. Bertsolariak Maialen Lujanbio, Unai Agirre, Jexux Mari Irazu, Agin Laburu eta Andoni Rekondo izango dira. Aritz Zerain arituko da gai jartzaile.
Sanjoanak iritsi arteko asteetan, izango dira urteurreneko ekitaldi gehiago.
