Kanaldudek haurrentzako saio bat estreinatuko du bihar goizean

'Maitexa eta miraila' programaren atal bakoitzak hamabost-hogei minutu iraunen du. XVI. mendeko pertsonaia bat sortu dute saiorako, fantasiazkoa.

Kanalduderen 'Maitexa eta Miraila' saioa. GUILLAUME FAUVEAU
Kanalduderen 'Maitexa eta Miraila' saioaren grabaketa bat. GUILLAUME FAUVEAU
Oihana Teyseyre Koskarat.
2025eko apirilaren 1a
05:00
Entzun 00:00:0000:00:00

Haur euskaldunentzat «eduki esklusiboa» sortzea da Maitexa eta miraila programaren helburuetako bat, Maryse Urruti emankizunaren gidoilariaren arabera. Kanaldudek ekoiztua da, eta bihar hedatuko dute lehen atala, 11:00etan; hamabost-hogei minutu iraunen du atal bakoitzak. «Inportantea zaigu haurrek ikustea dena dela posible euskararentzat eta dena egiten ahal dela euskararekin. Sentitzen ahal dute euskara jakinez emanaldi bereziak eskuratzen ahal dituztela», zehaztu du.

Kanaldudekoek manatu zioten programa Urrutiri, eta eduki pedagogikoa zabaltzeko helburua izanen du, besteak beste. Horretarako, pertsonaia berezi bat sortu du Urrutik: XVI. mendeko pertsonaia bat, fantasiazkoa, «bere bitxikeria guziekin». Maiana Etxeberrik eginen du Maitexarena.

«Guretzat inportantea da haurrak ez infantilizatzea eta serio hartzea. Gainera, horrek doinu libertate bat ematen digu, badirelako irakurketa maila desberdinak», erran du Urrutik. Maitexa deituriko pertsonaiaren inguruan eraiki du saioa: Mariren etxeko mirailaren aitzinean agertu, eta mirailarekin elkarrizketa bat abiatuko du Maitexak; Mari laguna du, eta desagertua da. «Maitexa mirailaria dela erraten dut; XVI. mendeko youtuberra. Segurrenik, gure ikusleek ezagutzen dituzte youtuberren kodeak, eta horiek berriz hartu ditut, baina distortsionatuz», esplikatu du Urrutik.

Ikusleei hainbat gairi buruzko bideoak erakusteko tresna bilakatzen da miraila, beraz: sukaldaritza, musika, arte plastikoak, matematika… Eduki pedagogiko horiek Kilika haurrendako sailaren barnean bilduko ditu Kanaldudek. Kilika-ren barnean, Maitexa eta mirailaz gain, hainbat emankizun izanen dira ikusgai: Giltzaera —musikari buruzkoaOinarrizkoak —marrazketa teknikoari eta matematikei buruzkoa…—, Ixkilim —eskulanei buruzkoa— eta Liburuxkak —ipuinei buruzkoak.

'Maitexa eta Miraila' Kanalduderen saioa
Kanalduderen 'Maitexa eta Miraila' saioko protagonista. GUILLAUME FAUVEAU

Eki Pagoaga Kanaldudeko langileak azaldu du aspalditik badituztela haurrentzako edukiak, baina orain artekoak ez direla haiek ekoiztuak. «Sail hori ireki nahi genuen zinezko gabezia bat ikusten genuelako haurrentzako ikus-entzunezkoen ekoizpenean. Ipar Euskal Herrian beharra bazen argiki, eta gure sentsibilitatearekin egindako eduki bat proposatu nahi izan dugu».

Erraterako, haurrentzako ikusgarri batzuk hedatu ditu Kanaldudek azken urteetan, kanpoan grabatutakoak, baita marrazki bizidun batzuk ere, baina Maitexa eta miraila izanen dute haurrentzako lehen saio berezitua. «Eduki zentral bat izanen da, eta periferian bestelako eduki batzuk txertatuko ditugu», zehaztu du Pagoagak, Kilika-ren barnean bilduko dituzten edukiei erreferentzia eginez. Behin lehen atala hedatuta, bi aste guziz zabalduko dute atal berri bat; denera, hamar. 

Ariketa berezia

Maiana Etxeberri antzerkilariak «plazerez» hartu du proiektua. «Abentura zinez ederra da, eta plazer egiten du halako proiektuetan parte hartzeak. Euskaraz aritzea plazera da beti», haren arabera. Haurrentzako edukia izanik ere, antzezte prozesua besteetan bezalakoa zaio Etxeberriri. «Edozein pertsonaia jokatzeko, haren baitan sartu behar duzu, edukia haurrentzat izan ala ez. Ahal bezain egiazkoa izan behar duzu, eraiki behar duzu haren nortasuna, mugitzeko manera… Unibertso oso bat, azkenean». Urrutik zuzendu du jokoa, eta Etxeberrik zehaztu du elkarrekin «lan asko» egin dutela.

Senpereko (Lapurdi) Larraldea etxean grabatu dituzte emankizunaren atalak, azken asteotan. Prozesu luzea izan da, lehenik testua landu baitute, eta gero hasi baitira antzerki lanean. Azken asteetako lanari begira, Etxeberrik erran du errepikak goizetan egin dituztela, eta grabaketak, arratsaldez. «Egun osoa pasatzen dugu mundu berezi batean, eta ez dugu eguneko argia ikusten. Ariketa berezia da».

Ipar Euskal Herrian, telebista kate hauetan ikusi ahal izanen da saioa: Orangen 358 katean, Bouyguesen 339 katean, Freeren 948 katean eta SFR-ren 496 katean. Hego Euskal Herrian, Izarkom eta Onaro telekomunikazio operadoreen Begizta plataforma baliatu beharko da telebistan ikusteko. Kanaldude.eus-en zuzenean eta nahieran ikusteko aukera izanen da nonahitik.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Kazetaritza propio eta independentearen alde, 2025 amaierarako 3.000 irakurleren babes ekonomikoa behar du BERRIAk.