Gazteei ahotsa, gazteek emana

Irailaren 28an hasiko da Zulora eztabaida saioaren bigarren denboraldia. Ane Zuazubiskar kazetariak aurkeztuko du oraingo hori ere, sei atal izango ditu, eta bi astean behin argitaratuko dituzte Gaztearen Youtubeko kanalean eta sareetan. Hiru Damatxok ekoiztutako saioak hango eta hemengo gazteak elkartuko ditu berriro, gai «arantzatsuez» hitz egiteko: euskalgintzaren krisia, klima larrialdia eta metabertsoa izango dira denboraldi berriko eztabaidagaiak, besteak beste.

Gazteei emandako ahotsa baino zerbait gehiago da Gaztea irratiaren Zulora saio hori, Ane Zuazubiskar aurkezleak azaldu duenez: «Lehen denboraldian ikusi genuen gazteei ahotsa ematea baino gehiago, gazteek gazteei ahotsa ematea izan zela gakoa. Parez pareko horretan uste dut asmatu genuela, edo behintzat espazio hori sortu genuela: lasai, gustura, konfiantzaz eta guretik aritzeko espazio bat. 'Gazteei ahotsa eman behar diegu' esaten da askotan, baina goitik beherako ariketa bat izan ordez, parez pareko ariketa bat izan da gurea».

Eta berritasunekin datoz: plato berritua, jantzitegi zainduagoa, baliabide tekniko gehiago... «Iazkoak esperimentutik izan zuen asko, eta aurtengoak ere izango du, baina ikasi dugu gauza batzuk hobeto nola egin. Eta irudi aldetik eta soinu aldetik dagoen kalitate salto hori ez dela mugatzen horretara bakarrik. Gauza asko finkatu egin dira, eta horrek eman digu bidea gaiei beste fundamentu batekin heltzeko. Gaien tratamenduan ere badago oraingoan beste buelta bat», nabarmendu du Zuazubiskarrek.

Aurpegi berriak

Aurpegi berriak ere izango ditu saioak: Leo Bueribueri eta Antton Telleriarenak, besteak beste. «Bueribueri da gure zaurian atzamarra sartzen duen lankidea. Interesgarria da, traba egiten duen iritzi horietako bat delako, zentzurik onenean. Euskal gazte zuri eta normatiboei zoragarri datorkigu Leo entzutea». Telleriak, berriz, fikziozko pertsonaia bat sortu du, «denok barruan daramagun ahots atzerakoia ordezkatzeko». Julen Portillo umoristak jarraituko du Zulotik at izeneko kaleko elkarrizketak egiten, eta saioak presentzia handiagoa izango du sareetan, Instagramen eta Twitterren ez ezik, Tiktokeko profila ere izango baitute.

Zuazubiskar kazetaria da. Prentsa idatzian egin zituen lehen urratsak, Euskadi Irratiko Faktoria saioan ari da egun, eta Zulora saioan estreinatu zen iaz kamera aurreko lanean. «Esperimentu totala izan zen, eta zertara nindoan oso ondo jakin gabe joan nintzen. Egia da telebista dela, baina telebista tradizional horretatik aldentzen dela ere bai. Aurten igarri dut lasaiago aritu naizela, beste soltura batekin. Iaz, amaieran iritsi nintzen disfrutatzera, eta, aurten, hasieratik aritu naiz gustura eta gozatzen», nabarmendu du aurkezleak.

Irailaren 28tik aurrera egongo da lehen saioa ikusgai. Klima larrialdia izango dut hizpide. Gonbidatuak: Gorka Laurnaga, Anne Rodriguez eta Mikel Izturieta.