«Gaur-gaurko gaiak gazteen ikuspegitik landuko ditugu»

Gaurko aurkezpenarekin batera sareratuko da Ehkz gazteentzako Interneteko ataria. Miarritzeko Atabalen (Lapurdi) aurkeztuko dute proiektua, 19:30ean. Aurretik, Ipar Euskal Herriko gazteriaren erronkak hitzaldia eskainiko dute, 15:00etan, baita tailerrak ere, 17:30ean. Aurkezpenaren ondoren, Zea Maysek kontzertua joko du. Ekhi Erremundegi (Baiona, 1989) da komunikabidearen sustatzaileetako bat. Haren arabera, gazte ororentzako hedabidea da. «Denei eman nahi diegu hitza». Horren erakusle da Ipar Euskal Herriko gazte antolakunde politiko guztiak bildu izana aurkezpen ekitaldian.

Gazteentzako hedabidea da Ehkz. Zein helbururekin sortu duzue ataria?

Gu gazteak gara, eta gazteentzako tresna gisa sortu nahi duguEhkz. Gazteei begira sortuko dugu, guk gazte bezala hutsune eta behar hori sumatu dugulako. Komunikazio arloan gazteentzat ez zegoen deus. Badira komunikabide tradizionalak, baina ez zaizkie gazteei mintzo. Ez dituzte aipatzen gazteen gaurkotasuna eta haiek egiten dutena. Horrelako tresnarik ez genuen Ipar Euskal Herrian.

Izango al duzue elkarlanik Hego Euskal Herriko hedabideekin?

Badira Euskal Herrian horrelako tresnak, eta horietan inspiratu gara, horiek dira gure ereduak. Gaztesarea sortzen ikusi genuen, eta Topatu-rekin harreman handia dugu. Dinamika horren barruan gaude. Proiektu nazionalekin gertatzen den moduan, Ipar Euskal Herriak bere tartetxoa bazuen, baina nahikoa ez, eta ez zen gurera heltzen. Guk ere Ipar Euskal Herriko gure proiektua aitzinera eraman nahi dugu, Ipar Euskal Herriari hurbilagotik segitu ahal izateko, bertako gazteengandik hurbilago egoteko, eta, era berean, gazteentzako proiektu komunikatibo nazionala hemengo informazioarekin hobeto elikatzeko.

Zer gai jorratu dituzue?

Denetarik. Aktualitate orokor eta politikoa gazte ikuspegi batetik landu nahi dugu. Horrek bi alde ditu. Batetik, gazteek egiten dutena aipatzea, eta, bestetik, gaur-gaurko gai orokor eta politikoak gaztetzea nolabait. Gazteen hitza ez dugu ezagutzen, ez da horren berri ematen eremu anitzetan, eta guk galdetu nahi diegu: zuek nola ikusten duzue Ipar Euskal Herriko egoera politiko-soziala?

Diozuenez, gazteen arteko harremana sustatu nahi duzue.

Gazteen arteko trukaketa bideratu nahi dugu. Gaur egun, zer daki Miarritzeko gazte batek Muskildiko batek egiten duenaz? Deus gutxi. Gazte saretze hori ere nahi genuke bultzatu, denak herri berean bizi direlako.

Hedabide elebiduna izango da, euskaraz eta frantsesez. Zein pisu izango du hizkuntza bakoitzak?

Euskarak izango du nagusitasuna. Gazte guztiengana iritsi nahi dugu, eta, maleruski, gaur egun hori egiteko elebidunak izan behar dugu. Ez dugu euskaraz egindako guztia frantsesera itzuliko, ezta alderantziz ere. Eduki batzuk euskara hutsean izango dira, eta beste batzuk, frantsesez. Hizkuntza orekan berdintasuna atxikiz gero, bi hizkuntzen desorekari eusten zaio. Horregatik du euskarak lehentasun garbia. Batetik, gure hizkuntza delako, eta, bestetik, amu batzuk erabili nahi ditugulako hizkuntzaren beharra nabarmentzeko. Interesa duzula egiten dugun lanean? Ba, ez zara osotasunera iritsiko, euskara ez duzulako.

Bi komunitateen arteko zubi lana ere egingo duzue horrela.

Atariaren izena Euskal Herria Zuzenean festibaletik dator; azken urteetan festibalak sortutako komunikazio tresna izan zen Ehkz. Euskal Herriaren ate izatea da festibalaren helburuetako bat. Guk ere rol hori bete nahi genuke, eta frantses pixka bat sartuta ate bat irekitzen dugu. Ate horretan sartzean Euskal Herria ikusten dute.

Zein pisu izango dute ikus-entzunezko edukiek?

Internetek euskarri guztietan lan egiteko aukera ematen du, eta gu ere horretan saiatuko gara. Proiektua egonkortzea eta erreferentzia izatea lortzen badugu, beste euskarri batzuetara hedatu nahi genuke. Garatzeko ideia asko ditugu buruan, baina hasi besterik ez gara egin.

Adierazpen eremu aske bat izan nahi duzue, pentsamolde askotarikoei hitza emanez.

Gazte orori eman nahi diogu hitza. Orain, hedabide guztiek bezala, gure ildo editoriala badugu. Horrek ez du kentzen UMPko baten hitza jasotzea.

Auzolanean eraikitako proiektua izaki, boluntario lana ezinbestekoa izango duzue, ezta?

Lanpostu bat sortzeko ideia dugu, eta kolaboratzaile eta boluntarioen lanaz elikatzea da helburua.Horretarako, deialdi berezia egin nahi diegu gazte guztiei, proiektuan parte har dezaten. Sortzaileen txokoa deitu dugun atalean Euskal Herriko artista gazteei haien lanak plazaratzeko eremua eman nahi diegu: bertsolariek, margolariek, idazleek... Ehkz-n badudute eremu bat mundu zabalera eramateko haien lana.