Galiziako Parlamentuak hedabide publiko galiziarren lege berria onartu du gaur, soilik PPren aldeko botoekin. Kontra azaldu dira BNG, PSdeG eta Democracia Ourensana. Bestalde, Galiziako irrati-telebista publikoko langileek greba eguna deitu dute gaurko, eta elkarretaratzea egin dute Santiagon. Protesta berean parte hartu dute Plataforma Por unha CRTVG ao Servizo do Pobo taldeko ordezkariek.
BNGko diputatu Olalla Rodilek salatu du lege berriarekin PPk «nahierara» aukeratu ahalko dituela CRTVGko zuzendari guztiak. Haren iritziz, Galiziako hedabide publikoak «PPren propaganda» bilakatu dira. PSdeGko diputatu Silvia Longueirak uste du hedabide publikoen «inboluzioa» dakarrela legeak.
CRTVGko langile batzordearen iritziz, lege berriak «ondorio kaltegarriak» izango ditu, talde publikoaren zuzendaria izendatzeko beharrezkoa zen gehiengo zabala ezabatzen baitu. Gainera, albistegietako lana kanpora ateratzeko debekua zuen aurreko legeak, eta aukera hori zabalik geldituko da orain. TVG telebista galegoz izan da orain arte, baina PPren lege berriak atea irekitzen du gaztelaniazko eskaintza bertan sartzeko.
Legearen aurka mintzatu dira azkeneko asteetan parlamentuko oposizioko alderdiak, sindikatuak, galegoaren aldeko herri mugimenduak, ikus-entzunezko sektoreko ordezkariak eta kazetari elkarteak, besteak beste.
Raquel Lema CRTVGko zentro arteko batzordeko presidenteak artikulu bat idatzi du El Salto hedabidean, eta bertan salatu du gaur Galizian desagertu egin dela hedabide publiko «plural eta duinak» izateko aukera. «Inork ez dio Xuntari galaraziko CRTVG propaganda aparatu handiena bilakatzea. Haien helburu bakarra da alderdiak botereari eustea, eta horixe egingo dute albistegi eta saio bakoitzean».
