France Medias izeneko holding bat sortuko du Frantziako Gobernuak, eta, horren barnean, bat egingo dute ikus-entzunezkoen hedabide eta enpresa publiko guztiek. Horren aurka daude sindikatuak, eta lanuzteak deitu dituzte gaurko eta biharko France Televisions, Radio France, France Medias Monde eta Frantziako Ikus-entzunezko Institutu Nazionalean. Tokiko irratietan eragin handia izaten ari da greba.
«Ikus-entzunezko publikoaren erreforma behar-beharrezkoa da sektore indartsu bat sortzeko», esan du Rachida Dati Frantziako Kultura ministroak, Le Parisien hedabideko elkarrizketa batean. Ministroaren ustez, lehiakide pribatuak «oso egituratuak» daude, eta «premiazkoa» da indar guztiak biltzea. «Gazteek telebista eta irrati publikoak alde batera utzi dituzte, eta horri erantzun egin behar zaio», gaineratu du.
Sindikatuen arabera, enpresa publikoen bat egiteaz gain, aurrekontuetan murrizketak egongo dira. «Kontrol politikoa lehen baino handiagoa izateko arriskua dago, eta egitura bertikalago bat eratuko dute», ohartarazi dute grebara deitu duten sindikatuek.
Frantziako Asanblea Nazionalaren batzorde batean hasiko dira bihar ikus-entzunezko erreformaren lege berria aztertzen. Eta sindikatuek protesta batera deitu dute bihar bertan, Parisen, 14:00etan. Radio Franceko sindikatuak kezkatuta daude, uste baitute irratiko enpresa «suntsitu» egingo dutela. Bestalde, baliteke France Medias Monde telebista publikoaren nazioarteko adar bat egitetik kanpo gelditzea. Hori da, behintzat, Frantziako Gobernuak gomendatu duena, AFP agentziak jaso duenez.
