Hasi dute 2024-2025eko irrati urtea Euskalerria irratian, eta pisu turistikoen gaiari heldu diote horretarako. Iruñeko Udalak erabaki du Alde Zaharrean pisu turistikoetarako lizentzia gehiagorik ez ematea, eta Euskalerria irratiko lantaldeak saio «monografikoa eta ibiltaria» egin du lehen goizean.
Gaurtik aurrerako egunetarako, Iruñeko irratiak berrehun kolaboratzailez osatutako programazioa ondu du. Esaterako, goizeko magazinean izango dira Abel Barriola eta Mikel Idoate pilotari ohiak, eta Edurne Egino sendagilea. Kultur sorkuntzak hartuko ditu arratsaldeak, eta Miren Mindegia eta Unai Lako kazetariek alorreko kolaboratzaileak izango dituzte bidelagun.
Maialen Huartek zuzenduko ditu goizeko albistegiak; Haritz Pascualek, aldiz, eguerdikoak. Iritzi emaile ariko dira, besteak beste, Bakartxo Ruiz, Isa Egiguren eta Idurre Eskisabel.
Bideopodcastak indartuko dituzte
Danel Pascualen eta Eneko Garciaren Flop Kultura eta Ion Celestinoren eta Amets Aznarezen Irratiak ordaintzen digu trena bideopodcastek jarraipena izango dute. Azaroan beste bi berri iragarri dituzte, baina ez dute ezer aurreratu oraindik.
