Maite Idirin Solatxi (Ugao, Bizkaia, 1943–Angelu, Lapurdi, 2024) aitzindaria izan zen alor askotan. 1960ko hamarkadan, Lurdes Iriondo eta Estitxu Robles-Arangiz abeslariekin batera, oldar berria eman zion euskal kantuari gitarra eskuetan zuela. Kantari lirikoa izateaz gain, euskal kulturaren sustatzailea eta lehen talde feministen bultzatzaileetako bat izan zen Idirin. Frankismoaren errepresioarengatik, Bizkaitik Lapurdira eta Parisera joan behar izan zuen bizitzera. Astelehenean beteko da urte bat hil zenetik, eta Iparraldearen orena saioko lantaldeak erreportaje berezi bat prestatu du: etzi estreinatuko dute, ETB1en, 15:10ean.
Artxiboko irudi eta argazkiak erakusteaz gain, Idirin ongi ezagutu zuten lagunen lekukotasunak bilduko dituzte saio berezi horretan. Patxika Erramuzpe eta Xabaltx kantariak entzun ahal izango dira, Maite Berrogain pastoral idazlea, Jacqueline Idiart militante feminista eta Luzien Etxezaharreta idazlea. Entzungai izango dira Idirinek berak zuzendu zuen Xaramela abesbatzan dabiltzan zenbait kantariren testigantzak ere, tartean Panpi Kurutxet eta Frantxoa Altxurrunenak.
Radio Euskadin ere aipatuko dute
Halaber, bihar bertan, Maite Idirin kantariaren ibilbidea aipatuko dute Radio Euskadin, Goizalde Landabaso kazetariak zuzentzen duen Hágase la luz irratsaioan. Igandero, 07:35ean, Franck Dolosor kazetariak Ipar Euskal Herriari buruzko tarte bat egingo du Radio Euskadin; biharko tartean, Idirin aipatuko dute.
