ETB1 kateak aurreko hilabeteetan baino batez besteko ikusle kuota txikiagoa izan du martxoan: %1,8ko kuota Araban, Bizkaian eta Gipuzkoan. Otsaileko datuarekin alderatuz gero, hamarren bat egin du behera. ETB2k %8,4ko batez besteko kuota izan du —puntu erdi bat egin du gora—. ETB3k %0,2ko kuota izan du, otsailean bezala.
Martxoan EAEn La1 izan da gehien ikusi den katea; bigarren tokian Tele5 dago; eta hirugarrenean, Antena3.
TV3 katea liderra da Katalunian: %14,7ko kuota lortu du; aurreko hilabetean baino sei hamarren handiagoa da datua.
Azkeneko egunetan, kirol emanaldien datuak izan dira nabarmenenak: atzo gauean, %9,3ko kuota izan zuen ETB1en Real Madrilek eta Realak jokatu zuten Espainiako Kopako finalerdietako itzulerako partidak —euskaldunen artean %19,8koa—, eta %21,6koa, La1n; luzapenak %13,6ko kuota izan zuen euskaraz —euskaldunen artean %26,3koa—, eta %32,6koa, gaztelaniaz. Araba, Bizkai eta Gipuzkoako datuak dira horiek.
Bestalde, joan den igandean %13,6ko ikusle kuota izan zuen ETB1en Ezkurdia-Rezusta eta Artola-Mariezkurrena bikoteek jokatu zuten Eskuz Binakako Txapelketako finalak. Hamar puntu gehiago lortu zituen emankizunak Nafarroan: %23,7ko kuota. 168.000 herritarrek egin zuten bat uneren batean ETB1eko kirol emanaldiarekin. Gainera, 19.000 herritarrek ikusi zuten pilota partida EITBren webgunean. EITB Pilotari Onena Saria Joseba Ezkurdiari eman zioten.