Datorren asterako, hiru greba egun deituak zituztenEl Diario Vasco egunkariko langileek. Baina gaur arratsaldean enpresako zuzendaritzak egindako proposamena bozkatu dute, eta, horren ondotik, lanuzteak bertan behera uztea erabaki dute. Horrenbestez, biharko deitua zuten elkarretaratzea eta azkeneko astelehenetan beltzez jantzita egin dituzten protestak ere bertan behera utziko dituzte. Sinadura greba ere egin zuten hainbat egunetan, baina kazetariak hasi dira berriz ohiko moduan artikuluak sinatzen.
2023ko abenduaren 31n iraungi zen Gipuzkoako egunkari horretan kazetariek zuten lan hitzarmena. ELA sindikatuak, bederatzi ordezkarirekin, eskaera hauek egin zizkion zuzendaritzari: soldatak KPIaren arabera eguneratzeko, soldata eskala bikoitzak kentzeko eta lanaldiak laburtzeko. Langileek egindako eskaera gehienak aintzat hartu ditu enpresak, eta, horrenbestez, baldintza hobeak izango dituzte lan hitzarmen berrituan.
Azkeneko asteetan, langileek elkarretaratzeak egin dituzte Donostiako egoitzaren aurrean, beltzez jantzita. Baina, enpresak eskaerak onartuta, protesta horiei amaiera emango diete.
