Cabezudoren biktimen lekukotzak, Disneyn

Kameraren aurrean jarri da emakume bat. Kontatu du nola ezagutu zuen Kote Cabezudo argazkilari donostiarra, nola modelo izateko ametsa zuen nerabe zela. Ametsa nola bihurtu zen amesgaizto. Bortxatu egin zuen Cabezudok, adingabea zela. Mehatxu egin zion gero: bortxaketa norbaiti kontatzen bazion, argazkiak argitaratuko zituela. Argazki haiek web pornoetan argitaratzen zituen argazkilariak. Lekukotza errepikatu egiten da. Cabezudo salatu zuten 22 emakumeetako batzuek Sr. Mono ekoiztetxearen dokumental saio batean parte hartzeari baiezkoa eman zioten. Disney Plusek asteazkeneanestreinatuko du En el nombre de ellas dokumental saioa. Lauatalez osatua dago, eta lau ordu eta erdi irauten du. EduardoMendoza kazetariak zuzendu du dokumental saioa. Fokua biktimengan jarri dutela nabarmendu du.

Melchor Miralles kazetariak hitz egin zion gaiaz Mendozari. «Ekoiztetxeko taldekook lau biktima ezagutzeko aukera izan genuen. Eta ezin genuen sinestu zer entzuten ari ginen; orduan jabetu ginen zer zegoen». Zuzendariak azaldu du biktimekin akordio bat adostu zutela. «Haiek prest zeuden haien istorioa kontatzeko, bi arrazoirengatik: kontua ezagutarazteko, eta beste emakume batzuk animatzeko bizi izan dutena edo egun bizi dutena salatzeko». Ekoiztetxeak biktimei promestu zien haiek izango zirela dokumental saioa ikusten lehenak. «Udan ikusi zuten. Eta behin ikusi eta gero, bakoitzak nahi duen erabakia hartu du». Haietako batzuen aurpegia ez da ikusten saioan, baina beste batzuena bai. «Ausardia handikoak dira, heroiak», dio Mendozak.

Preso dago Cabezudo 2018ko udaberritik. Epaiketa aurten egin dute, martxoaren 7tik apirilaren 13ra. 28 urte eta bi hilabeteko zigorra jaso du. Prozedura judiziala xehe-xehe kontatzen da saioan. «Dokumentazio lan handia egin dugu, ikerketa lan oso sakona izan da. Eta kontatzen dugu guztia autoetan eta agirietan oinarrituta dago», ohartarazi du Mendozak: «Gai delikatua da, asko sufritu duten pertsonez ari gara, eta zorroztasuna zen lehen premisa».

Sexu abusuak, mehatxuak eta bortxaketak, besteak beste. Biktimek kontatzen dutena argi gelditzen da dokumental saioan. Lehen atalean, biktima bat bizi izandakoa kontatzen ari da: birrindu egiten da, eta negar malkotan hasi. Kamerek grabatzen jarraitzen dute. Hala ere, Mendozak zera adierazi du: «Morbotik ihes egin nahi izan dugu, sentsazionalismotik ere bai». Zuzendariaren arabera, biktimak «gustura» daude haien parte hartzearekin eta dokumentalean kontatzen denarekin.

«Ezin da berriro gertatu»

En el nombre de ellas dokumental saioa egiteko proposamena egin zion Sr. Monok Disney Plusi, eta plataformari «oso interesgarria» iruditu zitzaiola gogoratu du Mendozak: «Oraingoz, Espainian eta Portugalen emititzeko eskubideak ditu Disneyk. Gustura egin dugu lan haiekin».

Biktimez aparte, elkarrizketatuen artean, sexu abusuetan adituak diren profesionalak daude. Esate baterako, Isabel Calvo psikoterapiako doktoreak adierazi du dokumentalak emakume askori lagunduko diela beren burua islatuta ikusten: «Biktimen lekukotzari esker, isiltasuna hautsiko dute». Mendozak honako hau ekarri nahi izan du hizpidera: «Auzi honetan, biktima batzuek auzitara jo eta kalbarioa bizi izan dute». Zuzendariak argi du: «Halako prozedura judizial bat ezin da berriro gertatu. Biktimak babestu egin behar dira». Salatzaileei justiziaren aldetik jaso zuten tratua gogor kritikatzen da dokumentalean.

Mario Diez abokatua da saioko protagonista nagusietako bat, biktimen akusazio partikularra eraman zuena. Saioan mintzo da Kote Camacho biktimak babesteko plataformaren bozeramailea ere. Parte hartzeari ezezkoa eman diote, aldiz, Espainiako Poliziak eta Odon Elorza Donostiako alkate ohiak. Melchor Miralles ageri da «auzia ikertu zuen kazetari bakar» gisa.

BERRIAk hiru biktimen lekukotza argitaratu zuen 2018an, eta auzibidearen gaineko informazio zabala eman du urteotan.