Ostegunean ziren banatzekoak aurtengo Gaztea sariak, Bilboko Euskalduna Jauregian. Ekitaldia, baina, bertan behera utzi du zuzendaritzak, Gaztea irratiko langileek greba egingo dutelako. Sare sozialetan eman dute horren berri langileek eurek, Instagramen sortu duten desGastea izeneko kontu berrian.
Ikusi gehiago
Langileek salatu dutenez, Gaztea eta EITB Musikako langileen kategoria profesionalak ez ditu euren egunerokotasuneko eginbeharrak aitortzen. «Urteak daramatzagu gure egoera birplanteaketa eta gure lan kargak eta ardurek exijitzen duten kategoria eskatzen», gogoratu dute.
Zuzendaritzaren «erabateko isiltasuna» kritikatu dute. Beharginen arabera, zuzendaritzak ez dio lan baldintzen auziari heldu nahi, eta ez du egoera eztabaidatzeko «inolako aurrerapausorik» eman.
Hori dela eta, langileek grebara jotzea erabaki dute. «Enpresak nahiago izan du Gaztea Sariak ekitaldia bertan behera utzi (horrek sortutako albo kalte ekonomiko eta sozial guztiekin), arazoari irtenbide bat eman baino», ohartarazi dute.
Eskaera argia egin dute langileek: amai dadila «Gaztea eta EITB Musikako lantaldeak jasaten duen prekaritatea eta diskriminazioa».
