Apurka ari dira iazko zinema aretoetan estreinatu ziren zenbait izenburu interesgarri Filmin plataformara iristen; berriena Bird (txoria)proposamen bereziaizan da.
Errealismo sozialeko zinema britainiarraren zantzuak dituen proposamen tipikoa da, non protagonista inguru erabat desegituratu eta kaotiko batean murgilduta dagoen, baina Andrea Arnoldek lan ezohiko bihurtzen duten oso geruza interesgarriak gehitu ditu; fantasia eta errealitatea modu nahiko interesgarrian uztartzen diren kontakizun guztiz gizatiarra da.
Baileyren istorioa azaltzen du. Familia giro anarkiko eta oso kaotiko batean bizi den 12 urteko neskatoa. Inguruko indarkeriari eta utzikeria emozionalari aurre egiten dion bitartean, Bird izeneko gazte misteriotsu bat ezagutuko du.
Arnolden zuzendaritza neskatoarentzat garrantzitsuak diren detaile txikietan zentratzen da, eta protagonistaren nahasmen emozionala ezin hobeto transmititzen du. Momentu gordinenetan ere edertasuna sortzea lortzen du; horrek hasieran zalantza asko sortu dizkit, baina kontakizuna haurraren ikuspuntutik kontatuta dagoenez, hautu hori ulergarria da. Telefonoaren kamera da Baileyren aliaturik handiena: batzuetan erasoa eta indarkeria dokumentatzen ditu, baina une iheskorrak eta liluragarriak ere harrapatzen ditu. Bailey eta Franz Rogowski aktore bikainak antzeztutako Bird misteriotsuaren arteko harremanak mistizismo geruza bat gehitzen dio filmaren tonuari.
Arnoldek oso modu eraginkorrean nahasten ditu errealismo soziala eta fantasiazko elementuak, hazkundeari, ahalduntzeari eta nortasunaren bilaketari buruzko alegia moderno honetan. Elementu fantastikoek, oro har, ongi funtzionatzen dute, baina egia da filmaren ikuspegi errealista kontuan izanda, narraziotik ateratzen gaituzten momentuak ere badaudela.
Barry Keoghan aktore ezagunak aita disfuntzionalaren rola jokatzen du, eta umore eta tragedia dosi bat eransten dio narrazioari. Rogowskik, berriz, istorioari alderdi samurra, onirikoa eta ia naturaz gaindikoa txeratzen dio.
Ez da film biribila, batzuetan galdu egiten delako bere baliabide formalean, baina biziki gomendatzen dudan lana da. Eguneroko bizitzaren gogortasuna irudimenaren magiarekin uztartzen denean gertatzen denari buruzkoa.
