Rick Beato 62 urteko estatubatuar musikari eta ekoizlea da. Azken urteotan bere Youtubeko kanalera 1.500 bideo igo ditu. Batez ere, musika teoria, produkzio teknika eta abesti ospetsuak aztertzen ditu.
2024ko AEBetako hamar abestirik ezagunenak ditu esku artean. Bakoitza entzun eta bere iritzia eskaintzen digu. Azken abestira iritsi da, lehen postuan dago Sabrina Carpenterren Espresso. Kamerara begiratu eta zera bota du: zerrenda guztiko abestiak benetako abestiak dira. Esan nahi du, badutela bertsoa, leloa eta abar. Harrituta dago. Benetako abestiak Billboard Top 10ean. Zerbait aldatzen ari al da?
Iazko udako jaien irudiak etorri zaizkit orduan burura. Kale nagusia jendez lepo. DJ ezagun bat ari da giroa animatzen. Gazteak pozik, abesti bakoitza kantatzen. Euskarazko, gaztelerazko eta ingelesezko abestiak tartekatzen dira sesioan.
Bada arreta eman didan gauza bat. DJak ez ditu abestiak osorik jartzen. Guraize sonoroak erabiltzen ditu. Sakelako telefonoko kronometroa atera eta abesti bakoitzaren iraupena neurtzen hasi naiz: minutu eta erdi abesti bakoitzeko. Bai, kanpotik ikusita, oso arraroa da eszena.
Ba al dago abestien iraupenean aldaketarik azken urteotan? Billboard zerrenda aztertuz gero, abestien luzeraren langa 1992. urtean izan zen. Lau minutu eta hamabi segundo zituzten bertako abestiek, batez beste. Urte hartatik aurrera, zerrenda horretako abestien iraupenak beheranzko joera du.
Spotify plataformaren 2023ko abesti arrakastatsuenen erdiak hiru minutu baino gutxiagokoak ziren. Antza denez, Tik-Tok plataformak ere abesti laburrak hobesten ditu eta horrek eragina omen du produzitzen diren abestietan. Zuzenean mamira.
Orduan gogoratu dut Bermeoko Los Brebes punk-rock taldea. Segundo gutxi irauten zuten haien abestiek. Zazpi minutu inguruko kontzertuak eskaintzen zituzten. Bai, zazpi minutuko kontzertuak.
Belaunaldi gazteen, sare sozialen eta bat-bateko plazeraren inguruko zutabe boomerra idaztera nindoan. Baina nor engainatu nahi dut? Algoritmoen erruz edo haiek gabe, dopaminara engantxatuta egotea ez da hain gauza modernoa, ezta Rick?
