Zutabe honetan, bere garaian, aipatu genuen 2013ko Her pelikula. Theodore izeneko gizon batek Samantha izeneko adimen artifizialeko laguntzaile birtuala du. Emakume sintetikoarekin hainbat ordu hizketan igaro ondoren, Theodore maitemindu egingo da.
Bueno, ba esango nuke, horrelakoak gertatzeko aukera biderkatu egin dela azken aste honetan. Zergatik? Bada, Sesame AIren bi laguntzaile birtualak aurkeztu berri dituztelako. Eta adimen artifizialeko bi pertsonaia horien ahotsak entzun ondoren, esan dezaket transmititzen duten sinesgarritasuna dardarka hasteko modukoa dela.
Her pelikula zientzia fikzio izatetik errealitate izatera igaro den aste honetan, bestelakoak irakurri ditugu Ted Gioairen berripaperean. Jazz kritikariak buletin ezaguna du, eta astero irakurtzen ditut atsegin handiz hark esateko dituenak. Aste honetakoa laburbilduko dugu.
Buletinean aipatzen du azken hilabeteotan joera aldaketa bat gailentzen ari dela gizartean. Eta ez da aldaketa hori ikusten ari den bakarra. Adimen artifizialen algoritmoen eta teknologia berrien gehiegikeriaren aurkako erreakzioaz ari gara. Eta erreakzio horri Erromantizismo berria izena jarri dio.
Haren hitzetan, antzeko zerbait gertatu zen duela 200 urte: XVIII. mendeko Arrazionalismoak eta Industria Iraultzak giza balioei kalte egin zieten. Horren ondorioz, Erromantizismoaren mugimendua sortu zen. Erromantizistak mintzatu ziren makinek gizakiak ordezkatzeak ekarritako alienazioaren aurka. Pentsa, William Blake idazle erromantikoak, adibidez, errota sataniko ilunak bezala deskribatu zituen fabrikak.
Gaur egungo teknologia konpainia handiak gizakien balioak eta ongizatea bigarren mailan uzten ari dira. Irabaziak dira maximizatu beharreko aldagaia. Eta horrek guztiak badu duela bi mende gertatutakoaren tankera.
Interesgarria da Gioiak aurreikusten dituenak hurrengo hamar urteotarako: teknologia horien aurkako kritiken areagotzea, eskoletan eta familietan lehenengo aldaketak sustatzea, eta honetan bai, ezker-eskuin politikariek bat egitea. Horien zantzu batzuk, gurean behintzat, ikusten ari garela esango nuke.
