Burujabetza teknologikoa eztabaidaren erdian kokatuko da hurrengo urteetan, baina hitzak berak interpretazio ezberdinak egiteko aukera ematen du, batzuk interes orokorretik urrun.
Arriskuetako bat burujabetza teknologikoa burujabetza nazional ez askatzaile bati lotzeko joeran dago. Macron ikusi dugu Frantziaren burujabetza teknologikoa defendatzen eta ez da bakarra izanen.
Beste arriskuetako bat eredu neoliberalaren muinean dagoen kontzertazio publiko-pribatuak estatu egiturengan daukan kontrola baliatuz, burujabetza, enpresa nazionalen (sic) autonomia estrategiko bati lotzean dago. Hau da, enpresa pribatu handiei baliabide publikoen trasbasea eta kontrolen murrizketa, kapital metaketa zalantzan jarri gabe. Azkena, burujabetza teknologikoaren alde egin nahi dutenen begiradatik ere, burujabetzaren ikuspuntu totalizatzaile bat izateari lotuta dago. Hau da, burujabetza osorik ezean, ez duela merezi pentsatzea, alegia. Burujabetza totala ezinezkoa edo oso zaila da; faktore teknologikoak gainditzen ditu, gainera. Burujabetzan kontzesioak, zesioak, pragmatismoa, aukera... nahasten dira. OSI ereduarekin edo errazago TCP/IP pilarekin aldera daiteke metaforikoki burujabetza.
Eredu horrek gailu ezberdinak sare bidez konektatzeko garaian erabiltzen diren protokoloak geruza ezberdinak dituztela definitzen du: maila fisikoak, transmisio bideak eta kodeketak definitzen ditu; datu-lotura mailak, sare homogeneo bateko bi makina konektatzeko ardura du; sare-arte mailak, sare heterogeneoen arteko komunikazioa bideratzen du; garraio-mailak, prozesuen arteko komunikazioa arautzen du eta aplikazio mailak aplikazio zehatzak (ftp, e-mail, http...). Denak dira beharrezkoak, maila fisikokoko kable edo uhin bidezko komunikazioa ahalbidetzen dutenetatik, erabiltzailetik gertuen dagoen aplikaziora arte.
Burujabetza teknologikoa pila bat balitz, azpiegituretatik hasi, datuetatik pasa eta teknologia horiek guztiak garatuko dituzten pertsonen ezagutza, denak lirateke garrantzitsuak. Geruza batek hurrengoarekin harremana dauka, baina aldi berean, autonomoa da hein handi batean. Burujabetzaren pilan beraz, geruza batean aurrerapenak eman daitezke eta horrek burujabetza orokorrean eragina izango du, dena lortzera itxaron behar izan gabe.
![gorka julio gorka julio](https://www.berria.eus/uploads/s1/59/09/17/9/gorka-julio.png)
IRLEN SAREA
Burujabetzaren pila
Iruzkinak
Ez dago iruzkinik
Ordenatu