Anarkismoaren inguruko telesail dokumental interesgarri bat aurkitu dut HBO Maxen. Esaldi hori entzun ostean, anarkismoaren hasieraren inguruko dokumental bat gomendatuko zidatela uste nuen. Gomendio horren atzean ez nuen espero anarkismo kapitalista baten inguruko dokumentala aurkituko nuela. Hasteko, anarkismoa eta kapitalismoa batera aurkitzea arraroa egin zitzaidan, baina horrek The Anarchists telesaila ikusteko interesa piztu zidan.
Anarkokapitalismoa estatuaren desagerpenaren alde dagoen mugimendua da. Horrez gain, jabetza pribatuaren eta merkatu librearen alde daude. Dokumentaleko protagonistek AEBetatik ihes egiten dute, eta anarkiaren bila Mexikoko Acapulco hirira joan dira. Bertan Anarchapulco ekitaldia antolatu zuten 2015. urtean, eta bertan ezagutu ziren dokumentaleko protagonistak. Ekitaldiaren burua Jeff Berwick da. Bere helburua festetan ondo pasatzea eta ekitaldiarekin dirutza lortzea da. Berwickekin batera, Freeman familia, eta John eta Lily aurkitzen dira. Freeman familiak Atlanta (AEB) alde batera utzi zuen. Beren helburu nagusia seme-alabak askatasunez heztea zen. AEBetako legediak 6 urtetik aurrerako umeak eskolaratzea derrigortzen du, eta freemandarrak horren aurka zeuden.
John Galton eta Lily Foresterren kasua desberdina da. AEBetan arazoak izan zituzten, bertan bizitza zoriontsu bat izateko aukera gutxi zituzten, eta kartzela zigorraren mehatxupean zeuden. Horregatik, anarkismoa oinarri hartuta, Acapulcora joan ziren. Beraientzat kapitala ez da hain garrantzitsua eta dokumentalean parte hartzen duten guztietatik anarkia klasikora gehien gerturatzen direnak dira.
Anarchapulco ekitaldia urtero handiagoa egiten ari zen, eta kriptotxanponen arduradunak ere bertara gerturatu ziren. Dokumentalean zehar, dirua eta anarkismoaren erlazio arriskutsua agertzen da. Komunitateko kideen artean arazoak hasi ziren, eta John Galtonen erailketak dena aldatu zuen. Telesailak denetatik nahasten du: ustelkeria ekonomikoa, jendearen arteko gatazkak eta hilketaren atzean komunitatearen kideren bat egon daitekenaren susmoa. Bakunin bere hilobitik altxatuko balitz, ez dakit zer pentsatuko lukeen anarkista hauen inguruan. Bitartean, ikusleok errealitate utopiko horretan gertatutakoarekin txundituak geratu gara.
![Amaia Garcia. Amaia Garcia.](https://www.berria.eus/uploads/s1/30/00/50/amaia-garcia.png)
EKOGRAFIAK
Anarkismoa
Iruzkinak
Ez dago iruzkinik
Ordenatu