Faboritoa zen, eta ez du huts egin. Iker Vicentek aizkora apustua irabazi dio gaur Julen Alberdi Txikia IV.a-ri, Tolosako zezen plaza betean (Gipuzkoa). 7.000 euro jokatu zituen bakoitzak; beraz, garaipenari esker, otsagabiarrak 14.000 irabazi ditu.
Vicente hasi eta buka gailendu da. Indartsu ekin dio lanari, eta berehala atera dio aldea Alberdiri. Aizkorakadaz aizkorakada, abantaila handituz joan da. Lan erdietan jada lau minutu baino gehiagoren aldea zuen. Bata gozatzen, eta, bestea, aldiz, ezinean.
Azkenean, Vicentek 51 minutu eta bost segundo behar izan ditu kana-erdiko hamalau eta 60 ontzako zortzi enbor mozteko. Txikia IV.ak, berriz, ia hamar minutu gehiago behar izan ditu: ordubete eta minutu bat.
