NORVEGIA NAGUSITU DA
Norvegiak irabazi du dominen sailkapena, azken aldiz hori egin eta hamasei urtera. Marka guztiak apurtu ditu, inoiz baino domina gehien irabazi baititu (39): urrezko eta zilarrezko hamalauna eta brontzezko 11. Alemania (31) eta Kanada (29) sailkatu dira haren atzetik. Pyeongchangen eginikoari esker, norvegiarrek sendotu egin dute lehen postua Neguko Jokoetan domina gehien irabazi dituzten herrialdeen sailkapenean: 368 lortu dituzte. AEBak (313) eta Alemania (238) dira bigarren eta hirugarren.
Norvegiak ekitaldi honetan lortutako 39 dominetatik hamalau iraupen eskian irabazi ditu. Marit Bjoerjen handia nabarmendu da berriz. Beste bost domina —urrezko bi, zilarrezko bat eta brontzezko bi—gehitu dizkio bere garaipen zerrenda ikusgarriari. Inork ez ditu hark baino domina gehiago lortu Pyeongchangen, ezta Neguko Olinpiar Jokoen historian ere. Hamabost ditu: urrezko zortzi, zilarrezko lau eta brontzezko hiru.Ole Einar Bjoerndalen haren herrikideak zuen aurreko marka, hamahiru dominarekin.
Johannes Hoesflot Klaebok ere uzta ederra bildu du Norvegiarentzat, urrezko hiru domina irabazi baititu iraupen eskian. Hura eta Martin Fourcade Herrialde Katalanetako biatleta dira Hego Korean urre gehien irabazi dituztenak. Beste hemezortzi kirolarik, berriz, bi eskuratu dituzte. Ester Ledecka txekiarra nabarmentzen da horien artean, eski alpinoan (supererraldoian) eta snowboardean (eslalom erraldoi paraleloan) nagusitu baita. Inork ez zuen halakorik egin.
GAZTE BIKAINAK
Kirolari gazteen ekitaldia izan da Pyeongchangekoa. Alina Zagitova patinatzaile artistiko errusiarra da horren erakuslerik nabarmenena, 15 urterekin bi domina irabazi baititu, urrezkoa banakakoan eta zilarrezkoa taldekakoan. Halere, ez da Neguko Olinpiar Jokoetan urrea bereganatu duen kirolaririk gazteena, hilabeteko aldearekin. Julia Lipnitskaia haren herrikideak dauka ohore hori.
Gerard Redmond eta Kim Chloe estatubatuarrek ere zeresana eman dute gazteen artean, 17 urterekin izan baitira olinpiar txapeldun. Snowboardean lortu dute biek urrezko domina: Redmondek slopestyle proban, eta Chloek halfpipean.
EUSKAL HERRITARRAK, APAL
Euskal herritarrei dagokienez, apal aritu dira. Lucas Egibar zen dominaren bat irabazteko aukera zuen bakarra, eta donostiarra patal aritu zen snowboardercrossean. Final-zortzirenetan geratu zen lehiaketatik kanpo, eta27. postuarekin konformatu behar izan zuen azkenean. Lan oso eskasa da hori, kontuan hartuta domina bat irabaztea buruan zuela.
Felipe Montoyak ere ez du helburua bete bere estreinakoan. Finalerako sailkatu nahi zuen patinatzaile artistiko donostiarrak, baina oso urrun geratu zen asmo horretatik. 24 sailkatzen ziren finalerako, eta Montoya 29. izan zen. Patinatzaile bakarra izan zuen atzetik.
Apal aritu da Juan del Campo ere. Eskiatzaile mungiarrak esana zuen, 23 urte izanda, hurrengo Jokoak zirela aproposagoak berarentzat. Esperientzia moduan aprobetxatu nahi zuen ekitaldi hau. Bada, askorako ez dio balio izango, bi probatan lehiatu eta ez baitu bakarra ere amaitu.
Azkenik, Imanol Rojo iraupen eskiatzaile tolosarrak Sotxikoaren antzeko jarduna egin du, 50 kilometrokoan lortu baitu emaitzarik onena: 35. postua. Beste hiru probatan oso atzean ibili da.
KIROLAZ KANPOKO GAIAK, BIGARREN LERROAN
Lehiaketaz kanpoko gaiek bereganatu zuten arreta ia osoa Olinpiar Jokoak hasi aurretik: dopinagatik Nazioarteko Olinpiar Batzordeak (NOB) Errusiari ezarritako zigorrak, eta bi Koreak desfilean elkarrekin joan eta izotz hockeyko talde bateratua osatzeak batez ere. Bada, kirolaz kanpoko gaiak bigarren lerroan egon dira lehiak iraun duen egunetan.
Nolanahi ere, dopinak berriro zipriztindu du lehia. Lau kirolarik eman dute positibo Pyeongchangen: Alexander Krushelnitski (curlinga) eta Nadezha Sergeieva (bobsleigha) errusiarrek, Kei Saito pista txikiko abiadura patinatzaile japoniarrak eta Ziga Zeglic izotz hockeyko jokalari esloveniarrak. Krushelnitskik brontzea irabazi zuen binakako mistoan, eta domina itzuli behar izan du.
