Urtea biribildu, urtea apaindu

Egur Sportek urte osoan antolatzen ditu herri kiroletako txapelketak, baina grazia berezia du Gabonen jirakoak. Urtezahar egunean banatu ohi dituzte urteko azken txapelak, eta ondo amaitzea beti da hurrengorako hauspo. Hargatik, ikusmina piztu ohi dute Asteasun (Gipuzkoa) jokatzen dituzten finalek.

Aurtengoa ez da salbuespena izango. Goreneko koskako kirolariak batuko dira Usarrabi pilotalekuan (17:00). Urrezko Aizkolarien Kopan, maila oneko hiru kirolari ariko dira nor baino nor gehiago. Hodei Ezpeleta da bat; Euskadiko Federazioaren txapelketa irabazi du aurten, bigarren aldiz jarraian, eta jada adierazia du puntako aizkolariengana gerturatzea duela xede.

Haietako bi izango ditu kontrario. Batetik, Julen Alberdi Txikia IV.a. Azkoitiarra da aurten hobekien moldatu den aizkolaria, maila goreneko kirolariak biltzen dituzten bi txapelketak irabazita: Sherpa Ai eta Donostiako Urrezko Kopa.

Bestetik, Mikel Larrañaga da parte hartzekoa. Azpeitiarrak txapelketa asko jokatu ditu aurten, eta Iker Vicenteren aurkako apustua ere egin du. Gipuzkoako Txapelketa da aurten lortu duen garaipen nagusia. Kontuak horrela, lehen biek urtea biribiltzea izango dute xede; Larrañagak, berriz, sasoia apaindu nahi du, beste txapela bat zakuratuta.

Lanei dagokienez, erreskadan osatuko dute jarduna: hamabi kanaerdiko ebakiko dituzte segidan —54 ontzako enborrak dira—. Hori da jaialdiaren beste berezitasuna, Egur Sportek proba tartekatuak jartzen baititu ohituraz.

Aizkoraz gain, harri jasotzaileek ere bete-beteko lehia izango dute. Hiru bikote sailkatu dira Binakako Txapelketako finalerako: Aimar Galarraga eta Paulo Azpiazu; Jon Unanue Goenatxo III.a eta Hodei Iruretagoiena Izeta IV.a; eta Xabier Aranburu Guzta eta Xabat Olaizola.

Hiru bikote horiek dira azkeneko hilabeteetan kanporaketak gainditu eta gaurko finalerako sailkatu direnak. Urratsez urrats egin dute finalerako bidea, eta gaur txapela janzten duen bikotea gailenduko da.

Aurrez, baina, ondo egin beharko dituzte beren lanak. Izan ere, aurreko kanporaketen aldean gogorragoak izango dira gaur egin beharrekoak. 175 kiloko errektangularrarekin, 125 kiloko kubikoarekin eta 100 kiloko zilindro zaharrarekin nahiz bolarekin lehiatuko dira, hiruna minutuko txandatan. Denbora da, hain justu ere, berritasun nagusia: lehendabiziko harriekin minutu bat gehiago osatu beharko dute, sailkatze faseko lanekin alderatuta.

Lau kiroletan lehiatuko dira

Asteasun jokatuko da, halaber, taldekako lehen txapelketako finala ere. Larrun eta Txindoki multzoak ariko dira nor baino nor gehiago. Esti Gastearenak, Patricia Martinek, Maika Ariztegik eta Nerea Sorondok osatuko dute lehen taldea; bigarrena, berriz, Ai nitze Zumetak, Udane Ostolazak, Nerea Arrutik eta Lierni Osak. Lau kirol uztartu beharko dituzte proba horretan: txingekin, harri jasotzen, aizkoran eta ingudean ariko dira.