Txapela Lehen Mailako euskal talde onenarentzat

Lehen Mailan bost euskal talde ari direla baliatuta, Euskal Herria Kirola elkarteak txapelketa antolatu du Euskal Herriko talderik onena izendatzeko helburuarekin. Alavesek, Athleticek, Osasunak, Eibarrek eta Realak elkarren aurka jokatuko dituzten partidek —20 guztira— sailkapen propioa sortuko dute. Hala, puntu gehien lortzen duten bi taldeek elkarren aurka jokatuko dute finala datorren urteko abuztuan. Mikel Etxarri eta Joseangel Iribarrek babesa adierazi diote egitasmoari.