Szegedetik Tokiora

Sari bikoitza irabazi du Iñigo Peñak (Zumaia, Gipuzkoa, 1990) asteburu honetan Szegeden (Hungaria), Munduko Txapelketan: batetik, iaz Portugalen egin bezala, zilarrezko domina jantzi du Paco Cubelosekin K2 1.000 metrokoan; eta bestetik, emaitza horri esker, sailkatu egin da 2020ko Tokioko OlinpiarJokoetarako. Azken txapelketa garrantzitsuetan gertatu bezala, Alemaniako ontzia bakarrik izan dute aurretik. Pozarren zen zumaiarra domina jasotakoan. «Oso pozik gaude. Asteburu ederra izan da. Olinpiar Jokoetarako sailkatu gara, eta hori zen garrantzitsuena. Hori gutxi ez, eta zilarrezko domina lortu dugu. Ezin dugu gehiago eskatu. Urte bikaina izan da. Orain, gozatzeko unea da». Peña Rio de Janeiroko (Brasil) Jokoetan ere izan zen —bosgarren izan zen—; beraz, bigarren aldia izango du. Asmo handiagoak ditu orain: «Dominaren bat lortzea da helburua».