Realak 2-1 irabazi dio Valladolidi, ligako azken sailkatuari, eta Europarako postuetara gerturatzeko hiru puntu garrantzitsu lortu ditu. Azken minutuetan baretu egin da Imanol Alguacilen taldea, hurrengo astearteko Kopako finalerdietako partida garrantzitsua dela eta.
Bi taldeak aukerak sortzen saiatu dira partida hasieratik. Lehen minutua baino lehen, Juanmi Latasak urrutitik jaurti du ezkerrarekin, baina jokaldia baliogabetuta zegoen, Selih Amallah jokoz kanpo zegoelako. Aurrelari madrildarrak ia aprobetxatu du ere Remiroren eta Zubeldiaren arteko gaizki-ulertu bat. Reala ere areara gerturatu da, baina Marinek eta Oiartzabalek ez dute jokaldia bukatu.
Alvaro Rubioren taldeak goian jarri du defentsako lerroa lehen hamar minutuetan, eta hor goian egin dio presioa defentsa txuri-urdinari. Raul Moro bizkor hasi da ezkerretik, baina Hamari Traorek ondo defendatu du Valladoliden ezker hegala. Abuztuan min hartu zuenetik lehen aldiz aritu da hasieratik maliarra.
Ondoren, Valladolidek lehen aukera garbiak izan ditu. Lehenengo, Juricek gora bota du Realak gaizki urrundu duen baloi bat. Bi minutura, Ivan Sanchezen ezkerkada Remirok ondo geratu du, eta errebotea kanpora bota du Morok. Hiru minutura, atezain nafarrak beste geldiketa bat egin dio Ivan Sanchezi. Javi Lopezek asko sufritu du hasieran.
Realak baloiaren jabetza berreskuratu du, eta 23. minutuan, Oiartzabalek lehen gola sartu du. Marinek ezker hegaletik jarritako erdiraketa airez errematatu du eibartarrak, eta aurtengo lehen gola sartu du Espainiako Ligan. Bakarrik jaurti du bolea kapitainak, David Torres defentsak irrist egin baitu.
Imanol Alguacilen taldeak baloiarekin jarraitu du, partida kontrolpean zuela. Bi alboko hegalek gola sartzeko aukera izan dute, baina Javi Lopezen eta Traoreren jaurtiketak langa gainetik joan dira. Realak azken aukera izan du atsedenaldia baino lehen, baina Sergio Gomez ez da iritsi Lopezen erdiraketara.
Garaipena bideratu
Reala biziago atera da bigarren zatian, eta Olasagastiren jaurtiketa Rafusen atearen gainetik joan da. Cordero Vegak txartel horia atera die Javi Sanchezi eta Selim Amallahi lehen bost minutuetan, eta Kubok penaltia eskatu du, Aznouk galtzetatik eutsi diolako. Lehen zatian Marinek ere penaltia eskatu du, Juricek lepotik eutsi diolako korner batean.
Alvaro Rubiok Mamadou Sylla zelairatu du, baina bi aurrelarirekin ere ezin izan du txuri-urdinen areara gerturatu. David Torresek txartel horia ikusi du Oiartzabali area izkinan egindako faltagatik, eta falta horretan bigarren gola sartu du Realak. Sergio Gomezek erdiratu du falta, eta zuzenean barrura joan da, inork errematatu gabe. Olasagastik eta Kubok beste bi aukera izan dituzte, baina ez dute hirugarren gola lortu.
Reala lasaitu egin da. Dani Diazek lehen aldiz jokatu du lehen taldean, eta Arkaitz Mariezkurrena ere zelairatu du Imanolek, Rayo Vallecanoren aurka gola sartu zuen harrobiko jokalaria. Astigarragakoak lehen aldiz jokatu du Anoetan Realeko lehen taldearekin.
Txuri-urdinak neurketa lokartzen saiatu dira, eta Valladolidek aukerak sortu ditu. Chukik, Latasak eta Javi Sanchezek gola sartzeko aukera izan dute, eta, azkenean, Latasak buruz sartu du, 93. minutuan. Valladolidek hiru falta erdiratu ditu azken minutuetan, baina Realaren defentsak erraz urrundu ditu erdiraketak.
Txuri-urdinek garaipen garrantzitsua lortu dute Real Madrilen aurka Espainiako Kopako finalerdietako itzulera jokatu baino lehen. 39 puntu ditu Realak ligan, eta Europara sailkatzeko postuetara gerturatu da. Real Valladolidek 21. aldiz galdu du, eta urrun du Lehen Mailan jarraitzea.
Reala 2-1 Valladolid
Reala. Remiro; Traore (Aramburu, 73. min), Zubeldia, Aritz, Javi Lopez; Zubimendi, Olasagasti (Turrientes, 82. min); Kubo (Dani Diaz, 82. min., Marin (Sucic, 67. min), Sergio Gomez; Oiartzabal (Mariezkurrena, 73. min).
Valladolid. Rafus; Luis Perez, Javi Sanchez, David Torres, Aznou; Juric (Grillitsch, 62. min), Mario Martin (Chuki, 76. min); Ivan Sanchez (Arnu, 83. min), Amallah (Sylla, 62. min), Moro (Machis, 76. min); Latasa.
Golak. 1-0: Oiartzabalek (23. min). 2-0: Sergio Gomezek (68. min). 2-1: Latasak (93. min).
