Azkenean bai: Sadiq Umarrek Realean jokatuko du. Talde txuri-urdinak merkatua zabalik zegoen azken egunean baieztatu zuen Nigeriako aurrelariaren fitxaketa. Hark hartuko du Alexander Isaken lekua. 2027-2028 denboraldira arte fitxatu du. Talde txuri-urdinaren inoizko fitxaketarik garestiena da. 20 milioi euro ordaindu dizkio Almeriari, eta, helburu batzuk betez gero, beste bost ordaindu beharko dizkio. Gainera, Espainiako taldeak portzentaje bat jasoko du, baldin eta Realak aurrelaria saltzen badu etorkizunean. Nigeriarrak 25 zenbakia eramango du elastikoan, klub txurdi-urdinak jakinarazi duenez. Sadiqen ezaugarri nagusia gol sena da. Almerian jokatu dituen azken bi denboraldietan, adibidez, 41 gol sartu ditu.
Goizean iritsi da aurrelaria Donostiara, eta osasun azterketa pasatu du. Realak duela minutu batzuk egin du ofizial fitxaketa. Hala, lau izan dira Realak denboraldi honetarako fitxatu dituen jokalariak: Take Kubo, Brais Mendez, Alexandre Sorloth (utzita arituko da) eta Sadiq bera. Ezusterik ezean bihar egingo du lehen lan saioa nigeriarrak taldearekin, eta ikusi beharko da Imanol Alguacilek deialdian sartzen duen larunbatean talde txuri-urdinak Atletico Madrilen aurka jokatuko duen ligako partidarako. Neurketa larunbatean jokatuko dute 18:30ean.
