Zubietan zortzi denboraldi egin ostean, Robin Le Normandi (Pabu, Frantzia, 1996) agur esan dio Realak. Erdiko atzelariari bi urteko kontratua gelditzen zitzaion Donostian, baina Atletico Madrilen jokatuko du datorren denboralditik aurrera, bi taldeak akordio bat egin ostean: Madrilgo taldeak 30 milioi eurotik gora ordaindu dizkio Realari.
Le Normand 2016an iritsi zen Realera, eta, Sansen bi urte igaro ostean, lehen taldera igo zen. 221 partida jokatu ditu elastiko txuri-urdinarekin, eta Espainiako Kopa irabazi zuen Realarekin 2021ean. Iaztik Espainiako selekzioarekin ari da, eta Eurokopa irabazi berri du talde horrekin.
Denboraldia amaitu berri zela piztu ziren lehen zurrumurruak Donostia aldean. Atletico Madrilek erdiko atzelari bat nahi zuen, eta Le Normand omen zen Diego Pablo Simeone teknikariaren lehen aukera. Eurokopa jokatzen ari zen bitartean hainbat aldiz galdetu zioten kazetariek bere etorkizunarengatik, baina erdiko atzelariak ez zuen ezer argitu nahi izan. «Eurokopa amaitzean izango dugu horretaz hitz egiteko aukera», adierazi zuen behin eta berriro. Hala ere, atzelariaren adierazpenek ez zuten ezer onik iragartzen Realaren zaleentzat.
Hilabete pasatxo igaro da ordutik, eta, azkenean, Realak gaur iragarri du Le Normand saldu dutela. Donostiako klubak esker ona adierazi dio Frantzian jaiotako jokalariari: «Onena opa diogu arlo profesionalean eta pertsonalean. Eskerrik asko guztiagatik, Robin».
💙 2016an iritsi zen Zubietara. Hazkundea izugarria izan da. 221 partida ofizial jokatuta txuri-urdin bezala eta La Cartujan lortutako Kopa izango du betirako bere palmaresean. Beti gogoratuko dugu bere sakrifizioagatik. Zorte on, Robin.#WeareRealpic.twitter.com/Ia5nPrPJh9
— Real Sociedad Fútbol (@RealSociedadEUS) July 27, 2024
Le Normandek 2022an berritu zuen kontratua Realarekin, 2025-2026ko denboraldia amaitu arte, eta 60 milioi euroko etete klausula zeukan. Ohi duen bezala, Realak ez du operazioaren xehetasunen berri eman, ezta Atletico Madrilek ere. Hala ere, Diario Vasco egunkariaren arabera, Madrilgo taldeak 34,5 milioi euro ordaindu dizkio Realari, eta, kontratuan ezarritako helburuak betez gero, Realak aukera izango luke beste bost milioi euro jasotzeko. Horiek horrela, Realak inoiz egindako salmenta garestienen artean dago Le Normandena. Alexander Isak (70 milioi euro) eta Antoine Griezmann (56 milioi euro) bakarrik saldu ditu garestiago.
