2020ko 3-4a gogoan, Realak balentria egin nahi du beste behin Santiago Barnabeun, Real Madrilen kontra, eta Espainiako Kopako finalerako sailkatu. (21:30, ETB1). Bigarren finala izango litzateke sei urtean, 2019-2020ko txapeldunak izan baitziren txuri urdinak; eta zortzigarrena Donostiako klubaren historian. Itxaropentsu mintzatu zen atzo Imano Alguacil teknikaria, partida aurreko prentsaurrekoan: «Real Madril da faborito. Baina sinetsita gaude finala jokatuko dugula. Gau magiko eta historiko bat izan daiteke biharkoa [gaurkoa]». Jokalariek final bat oparitu nahi diete zaleei.
Txuri-urdinek 0-1 galdu zuten joaneko neurketa Anoetan; beraz, irabazi beharra dute finalerako sailkatzeko. Luzapena saihesteko, berriz, bi golengatik edo gehiagorengatik irabazi beharko luke. Endricken gol batek erabaki zuen joaneko norgehiagoka. Brasildar gazteak Kylian Mbapperen ordez jokatu zuen, eta ederki baliatu zuen kontraeraso batean Bellighamek emandako pase bikain bat. Realak aurretik jartzeko aukerak izan zituen neurketaren hasieran, eta golaren ondoren ere berdindu nahian ibili zen. Bigarren zatian, berriz, Imanolek zuzendutako taldeari gehiago kostatu zitzaion aukerak sortzea, eta Real Madrilek eroso jokatu zuen. Hala ere, madrildarrek ez zituzten baliatu sortutako aukerak, eta ez zuten errenta areagotu.
Azken bi hilabeteetan izandako egutegi betearen ostean, duela bi aste etena izan zuen Realak. Martxoko bolada txarra atzean utzi zuten txuri-urdinek larunbatean, Valladolidi 2-1 irabazita. Distira oso gutxiko partida izan zen, baina hauspoa eman behar die. Izan ere, Manchester Unitedek kanpoan utzi ostean, seigarren urtez segidan Europan jokatzeko bi bide geratzen zaizkio Realari: Liga—une honetan bi puntura du zortzigarren postua, sailkatzeko modua emango liokeen azken tokia— eta Kopa bera. Finalerako sailkatuta, Donostiako taldea Europarako sailkatuta legoke, zeren finalean izango lukeen aurkari posiblea, Bartzelona edo Atletico Madril, Txapeldunen Ligarako sailkatuko baitira.
Txuri-urdinek estreinakoz jokatu dute Kopan, sasoi honetan, Lehen Mailako talde baten aurka Anoetatik urrun. Izan ere, etxetik kanpo kaleratu zituzten Jove Español San Vicente, Connquense eta Ponferradina. Anoetan beste bi talde kanporatu dituzte. 3-1 irabazi zioten Rayo Vallecanori final-zortzirenetan, eta 2-0 Osasunari final-laurdenetan.
Brais Mendez, Sheraldo Becker, Arsen Zakharyan, Jon Pacheco eta Alvaro Odriozola deialditik kanpo geratu dira, min hartuta segitzen baitute. Orri Oskarsson, ordea, osatu da. Deialdian jarraitzen dute, berriz, Realaren bigarren taldeko bi jokalarik: Marezkurrenak eta Dani Diazek. Larunbatean egin zuen debuta lehen taldearekin Diazek. Imanolek argi du non egongo den partidaren gakoa: «Areetan asmatzea izango da gakoa. Joaneko partidan ikusi zen. Real Madrilek guk baino aukera gutxiago izan zituen, baina bat sartu egin zuen».
Real Madril bizirik dago hiru txapelketetan, nahiz eta joko aldetik ez ibili hain ondo. Carlo Ancelottiren taldeak sufrituta irabazi zion Leganesi ligako azken jardunaldian, eta bigarrena da sailkapenean, Bartzelona hiru puntutara baitauka. Txapeldunen Ligan erraz menderatu zuen Manchester City, eta eta Atletico Madril penaltietan kanporatu zuen. Final-laurdenetan Arsenal izango du kontrario.
Duela bi aste, teknikari italiarrak esan zuen bere taldea ez zela aurkeztuko partida batetik bestera 72 ordu baino gutxiagoko atsedena izango balute. Ligako azken neurketa larunbateko 23:00etan bukatu zen, gaurko neurketa hasi baino 69,5 ordu lehenago —igande goizaldeko ordua kenduta—. Azkenean, Ancelottik atzera egin zuen. «Esan nuena izan zen ez ginela aurkeztuko baldin eta partidaren ordutegia aldatzeko aukera baldin bazegoen eta ez bazuten hala egiten». Dani Carvajal, Eder Militao, Dani Ceballos, Ferland Mendy eta Thibaut Courtois ez daude Espainiako taldearen deialdian.
Oroitzapen onak Bernabeun
Realak emaitza hobeak lortu ditu Espainiako Kopako finalerdietan, itzulerako partida etxetik kanpo jokatu duenean. Azkena Mirandesen aurka izan zen, 2020an: Imanolen taldeak 0-1 garaitu zuen Bigarren Mailako talde hori, eta gero hirugarren Kopa irabazi zuen Athleticen aurka. Bigarren Kopa irabazi zuen denboraldian, 1986-1987koan, txuri-urdinek talde bilbotarra kanporatu zuten San Mamesen, eta Atletico Madril garaitu zuten finalean penaltietan.
Gainera, Realak bi aldiz kanporatu du Real Madril finalerdietako itzulera Santiago Bernabeun jokatu denean: 1951n 0-2 irabazi zien madrildarrei, eta 0-4 1987-1988ko denboraldian. Bi urte horietan Bartzelonaren aurka galdu zuen finala.
Jokalari txuri-urdinek beste final batera iritsi nahi dute, eta zaleak harmailetan egotea. Izan ere, 2021ean ezin izan ziren Sevillan egon, COVID-19aren pandemiarengatik. Cartujari atletismo pista kentzeko lanak egin dituzte aurten, eta 70.000 zalek bete ahal izango dute Sevillako estadioa, lehen baino 10.000 gehiagok. Txuri-urdinek badakite zaila izango dela, baina ez ezinezkoa. Ametsak bizirik dirau.
