Espainiako Kopa irabazi eta astebete eskasera iragarri du Raul Garciak erretiroa hartuko duela. 37 urterekin utziko du futbola, Athletic Cluben elastikoa jantzita. Maila gorenean hogei denboraldi eman ditu nafarrak, eta, gaur-gaurkoz, 811 partida jokatu ditu futbol profesionalean. Ibilbide horretan 148 gol sartu ditu guztira. Taxoaren hazi zen futbolaria, eta, Osasunan eta Athleticen aritzeaz gain, zortzi urte egin zituen Atletico Madrilen. Guztira Espainiako Liga bat, bi Kopa, bi Superkopa, bi Europa liga eta bi Europako Superkopa irabazi ditu. Ezer ez da betiko, eta esaldi horrekin berarekin eman du agurraren berri jokalariak sare sozialetan.
Athleticek zabaldutako oharraren arabera, gaur goizean jakinarazi die Garciak taldekideei futbola uzteko erabakia, Lezaman bertan. Zelaian bizi izandako une ederrenetako bat bizi ostean esango dio agur nafarrak goi mailako kirolari. Izan ere, Athleticek irabazitako Espainiako Kopan berak sartu zuen aurreneko penaltia. Zaleek ez dute berehalakoan ahaztuko erdilariak gola sartutakoan egindako orroa.
Nafarrak datu ikaragarriak pilatu ditu goi mailan. Espainiako Ligan partida gehien jokatu dituzten jokalarien artean hirugarrena da Garcia, 602 neurketarekin. Andoni Zubizarretak eta Joaquinek soilik jokatu dituzte hark baino partida gehiago Espainiako gorengo mailan. Guztira, 356 partida jokatu ditu Athleticekin, 329 Atletico Madrilekin, eta 126 Osasunarekin. Hainbat garaikur ere altxatu ditu; gehienak, Atletico Madrilekin.
Patuak hala nahita, Atletico Madril eta Athletic nor baino nor gehiago ariko dira bi aste barru, Metropolitanon. Hil edo biziko partida izango da Txapeldunen Ligako postuei begira. Baina, hala ere, agur handi bat egingo diote jokalari nafarrari.
