F. GAVAZZI
Talde txikietako ehiztari fina
•Jaioterria. Morbegno (Italia).
•Jaioteguna. 1984ko abuztuaren 1a.
•Debuta. 2007an, Lampre taldearekin.
•Ibilbidea. Lampre (2007tik).
•Garaipenak. 2009an, Nurenbergeko Itzulia; 2010ean, Sardiniako Itzuliko etapa bat, Euskal Herriko Itzuliko etapa bat eta Coppa Agostoni; eta, 2011n, Euskal Herriko Itzuliko etapa bat.
EGUNEKO ATZERAPENA
Schleck anaiek oso berandu sinatu dute
Zigorrik gabe geratu ziren azkenean, baina Frank eta Andy Schleck anaiak (Leopard-Trek) oso berandu agertu ziren Eibarko irteerara, sinatzeko kontrolera. Epe jakin bat egoten da sinatzeko, eta hortik kanpo ibiliz gero, UCIren zigorra jasotzen da normalean.
EGUNEKO AGURRA
Damiano Cunego
«Ardenetako klasikoak dauzkat buruan. Sailkapenean ez nago goi-goian, eta larunbaterako [gaurko] erlojupekoa ez da egokia niretzat». Damiano Cunegok (Lampre) etxerako bidea hartu zuen herenegun, etapa amaitu berritan, eta atzo ez zen agertu irteerara.
EGUNEKO OMENDUA
Josetxo Esteban
Etapa hasi aurretik minutu bateko isilunea egin zuten atzo, Josetxo Esteban zenaren omenez. Eibarko Txirrindulari Elkarteko kidea zen, eta joan den igandean hil zen.
