Denboraldiko bigarren klasiko handia zentimetro gutxiko aldeaz irabazi du Jasper Philipsen esprinter belgikarrak (Alpecin). Faboritoen taldeak azken kilometroan aurreratu ditu ihesaldian geratzen ziren txirrindulari akituak, eta hor hasi da garaipena lortzeko bataila. Mathieu Van der Poel (Alpecin) zen faboritoetako bat, baina, haren taldekidea esprintean bizkorragoa denez, morroi lanak egin ditu harentzat.
Ziztu bizian eraman du Van der Poelek oilarren taldea helmuga lerrorantz, eta, 500 metro falta zirela, Lidl-Trekeko bi txirrindularik hartu diote erreleboa esprinta bideratzeko. Hala ere, Philipsenek eta Michael Matthews australiarrak (Jayco) berehala hartu diete aurrea, eta hortik amaierara arte bien arteko kontua izan da.
Matthews joan da hasieran aurretik, eta gurpilean izan du Philipsen, azken metroetan ezkerretik aurreratu duen arte. Azkenean, belgikarrak pasatu du lehenik helmuga marra, eta bere lehen Milan-Sanremo klasikoa irabaztea lortu du.
Bien atzetik sartu den lehena Tadej Pogacar (UAE) izan da. Esloveniarrak denboraldiko lehen klasiko handia irabazi zuen duela aste gutxi, Strade Bianchea, baina oraingoan ez du halakorik lortu. Pogacarrek erakutsi du ez dela soilik itzuli handiko gizona, klasiko guztietan faboritoen zerrendan agertzen baita. Strade Bianche, Lieja, Amstel Gold Race, Flandriako Tourra... horietan eta gehiagotan garaipenak lortu ditu, baina Milan-Sanremo da oraindik falta zaion klasiko handietako bat.
Udaberriko egutegiari begira
Azken asteetako lasterketekin, txirrindulariak ari dira gutxinaka txapelketako erritmoa hartzen, eta Philipsenek, Pogacarrek, Jonas Vingegaardek eta beste batzuek garbi utzi dute prest daudela lasterketak irabazteko. Udaberriko klasikoen garaia da orain, baina Euskal Herriko Itzulia, Volta, Suitzako Tourra eta Italiako Giroa ere ate joka daude.
Hurrengo klasiko handia Flandriako Itzulia izango da, martxoaren 31n, eta handik aurrera iritsiko dira Paris-Roubaix, Ardenetako klasikoak eta astebeteko itzuli handiak.
