KATIE LEDECKY
Txapeldun gaztea
20 urte besterik ez dituen arren, txapeldun handia da jada Katie Ledecky (Washington Hiria, 1997). Bost urrezko domina irabazi ditu Olinpiar Jokoetan horietatik lau iaz, Rion eta bederatzi aldiz izan da munduko txapeldun. Denetara moldatzen da igerilari estatubatuarra, eta oso ondo aritzen da hainbat probatan. Budapesten, igeriketa libreko bost probatan arituko da: 200m, 400m, 800m, 1500m eta 4x100m. Bostak irabazteko gai da.
SUN YANG
Meteorito txinatarra
Igerilari polemikoa da, berez, Sun Yang (Hangzhou, Txina, 1991).Kiroletik kanpo, igerilekuan bezain ezaguna da bere herrialdean: telebistako reality batean parte hartu zuen, gidabaimenik gabe gidatzen harrapatu zuten, dopin kontrol batean positibo eman zuen, beste igerilariekin liskarrak izan ditu entrenamenduetan... Igerilari ibilbide izugarria darama, hala ere: hiru urrezko olinpiar domina ditu, eta zazpi aldiz izan da munduko txapeldun. Munduko txapelketa honetan, lau probatan parte hartuko du, den-denak estilo librean: 200m, 400m, 800m eta 1.500m.
CHAD LE CLOS
Phelps gabe, lasai
Chad Le Clos (Durban, Hegoafrika, 1992) izango da kontuan hartu beharreko beste igerilarietakobat. Azken urteotan, Michael Phelpsen itzalean gelditu izan da betitximeleta estiloan eta estilo librean. Budapesten izango du aukera oraindik zeresana baduela erakusteko. Tximeleta estiloko 200 metroko urrea irabaztea da bere helburu nagusia, eta 100 metrotan ere lehiatuko da.
KATINKA HOSSZU
Etxean eta lanez lepo
Olinpiar Jokoetako hiru urrezko domina ditu, eta bost aldiz izan da munduko txapeldun. Etxean jokatuko du Hosszuk (Pecs, Hungaria, 1989), eta faboritoa da igeriketako ia proba guztietan. Guztira, hamabi probatan hartuko du parte, eta inor ez dadila harritudomina andana eskuratzen badu.
KOSUKE HAGINO
Phelps asiarra
Askotan alderatu izan dituzte Kosuke Hagino (Oyama, Japonia, 1994) eta Michael Phelps, biek hainbat probatan maila onena emateko duten gaitasunagatik. Askotan aitortu izan du, gainera, hura izan dela bere erreferente nagusia. Estiloetako 400 metroetako proba irabazi zuen Rioko Olinpiar Jokoetan, eta bigarren izan zen 200 metroetakoan. Bi proba horietan hartuko du parte Budapesten.
SARAH SJOSTROM
Abiaduraren erregina
Sarah Sjostrom (Salem, Suedia, 1993) da faborito nagusia abiadura probak irabazteko, eta lau urrezko domina eskuratzen saiatuko da munduko txapelketan. Sari zerrenda izugarriaren jabe ez ezik, lau munduko markaren jabe ere bada igerilari suediarra, bi igerileku luzean: tximeleta estiloko 50 metrokoa eta 100 metrokoa; eta beste bi igerileku laburrean: estilo libreko 200 metrokoa eta tximeleta estiloko 100 metrokoa. Budapesten, 50 eta 100 metroko probetan parte hartuko du, nola tximeleta estiloan, hala estilo librean.
IGERIKETA SINKRONIZATUKO ERRUSIAKO TALDEA
Betidanik irabazle
Igeriketa sinkronizatuan historikoki domina gehien irabazi dituen taldea da Errusia, Japonia eta Espainiaren aurretik. Sinkronizatuan, bederatzi txapelketa ezberdin jokatuko dira Budapesten: emakumezkoen zazpi eta bi misto. Errusia emakumezkoenetara bakarrik aurkeztuko da, eta guztietan da irabazteko hautagai nagusia. Eskura duen helburua da, 2015eko munduko txapelketan zazpiak irabazi zituen eta.
GREGORIO PALTRINIERI
Irteera txarrak, eta irabazle
Rion 1.500 metrotako urrezko domina eskuratuta iritsiko da Gregorio Paltrinieri (Carpi, Italia, 1994) Munduko Txapelketara. Igerilari nahiko baldarra izatearen ospea dauka, baita irteeretan eta biraketetan nahiko motela izatearena ere. Dena den, lan luzeetan oso ondo moldatzen dela erakutsi izan du bere ibilbidean. Olinpiar jokoetako urrezko dominaz gain, munduko txapeldun izan zen 1.500 metroetan duela bi urte. Sun Yangekin lehia estua izango du.
JULIJA EFIMOVA ETA LILLY KING
Urrea estu izango da
Munduko txapelketako lehia estuenetakoa izatea espero da. Julija Efimova (Grozny, Errusia, 1992) eta Lilly Kingek (Evansville, Ameriketako Estatu Batuak, 1997) bular estiloko 100 metroetan egingo dute topo. 2016ko Olinpiar Jokoetako finalean bi hamarren baino gutxiagoko aldea izan zen King txapeldunaren eta Efimova zilarrezko dominaren artean. Orduz geroztik, igeriketazale guztiak bien arteko lehia berriz ikusteko irrikan daude, eta ikusteko dago zer gertatuko den.
