Borrokan jarraitzeko gogoz daudela erakutsi dute gaur Jon Ander Peñak eta Jon Ander Albisuk. Bilboko Bizkaia pilotalekuan 15-22 irabazi diete sailkapen nagusiko liderrei, Lasori eta Iztuetari, eta sei onenen artean sartu dira behin-behinean. Altuna III.a eta Arangurenekin berdinduta daude orain, eta puntu batera dituzte Jaka eta Imaz.
Partidako jokalari onena Albisu izan da. Pilota atzeko koadroetara bidali du etengabe, jokoan sartzea eragotzi dio Lasori, eta Iztuetaren gain jarri du bikotearen pisua. Aspaldian egin duen norgehiagokarik onena egin du Ataungoak.
Lehen zatian eutsi dio Iztuetak (10-10), baina bigarren erdian sufritzea tokatu zaio. Indartsu jarraitu du Albisuk, eta Peñak asmatu du tantoak amaitzen.
Gaurko irabazleek partida erabakigarria jokatuko dute datorren asteburuan Hendaian (Lapurdi): Peio Etxeberria-Martijarekin neurtuko dituzte indarrak, azken postuan daudenekin alegia.
Ikusi gehiago
