Ez da ezustekorik izan, baina ustekabeko partida jokatu dute gaur Eibarko Astelenan Peñak eta Albisuk eta Zabalak eta Eskuzak. Lehenak ziren faborito gaur irabazi eta Binakako Txapelketako finalerdiak jokatzeko, baina Aspeko pilotariek estu hartu dituzte, eta gogotik egin behar izan dute lan 22. tantora iristeko. Elordi eta Zabaleta ordezkatuz jokatu dute Zabalak eta Eskuzak eta nekez izan zezaketen horiek ordezko hoberik. Zabala eta Eskuza ez dira joan ezer oparitzera, eta partida oso ona jokatu dute. Azkenean, baina, Peña eta Albisuk 22-18 irabazi dute, eta finalerdietan izango dira Ezkurdia-Rezusta, Laso-Iztueta eta Artola-Mariezkurrena bikoteekin batera. Aspaldiko partez lautik hiru bikote Baikokoak izango dira.
Lehen minututik lehiatu egin diete aurre ordezkoek faboritoei. Eskuzak boleaz bikain defenditzen duela erakutsi du, ez duela beldurrik aurrera joateko, eta Zabala, lotsagabe aritu da aurreko koadroetan, indartsu eta presiorik gabe. Markagailuan 5-4 aurreratu dira lehen aldiz Peña eta Albisu, baina inork uste bazuen aurkariek amore emango zutela lehen minutuak jokatu ostean, oker zegoen. Partida osoan eutsi diote erritmoari, eta are eta gehiago, minutuak aurrera joan ahala hobeto jokatu dutela. Sinistu egin dute partida irabaz zezaketela, eta Peñak eta Albisuk gorriak ikusi dituzte 22 tantoak egiteko.
Markagailuan 8-8 izan da beste berdinketa bat. Eskuzak hartu behar izan du gorrien pilotakaden zama, eta atzean tanto batzuk galdu baditu ere, gustura egoteko moduan da. Zabalak bere dohainak erakutsi ditu, eta nor baino nor jokatu du Peñaren aurka aurrean. Fin aritu da, bai gantxoekin baita alde batera botatzeko keinua egin eta pilota beste aldean utziz. Esan liteke partidaren lehen herenean garaipen partzial bat lortu dutela Zabalak eta Eskuzak, aurkariei zalantzak eraginez.
Partidaren ostean Albisuk aitortu du bazekitela gogor lan egin beharko zutela. Eta hala izan da. Bigarren zatian 18-13 aurreratu dira, eta bazirudien bideratuta zutela, baina ez da hala izan. Albisuk akats pare bat egin ditu atzean, eta Zabalak arriskatu eta asmatu egin du aurrean. Eskuzak aireko defentsarekin primeran jarraitu du, eta 19-17ra jarri dira Elordi eta Zabaletaren ordezkoak. Partidak aurrera egin ahala, presioa handiagoa zen faboritoentzat, baina horiek ere ez dute horren aurrean amore eman, pixkanaka bada ere, tantoak batuz joan dira.
Lortu dute urdinek berriro partidan sartzea, eta azken tantoraino egin behar izan dute borroka gorriek. 21-18koarekin Eskuzari txapa behera joan zaio pilota, eta Peñaren eta Albisuren besarkada partidan egindako lanaren eta izan duten sufrimenduaren adierazgarri izan da.
