2020. urteko txapelduna ez da izango Buruz Buruko Txapelketako final-laurdenetako ligaxkan. Peio Etxeberriak 13-22 irabazi dio Erik Jakari Tolosako Beotibar pilotalekuan (Gipuzkoa), eta argi utzi du zeresana emateko asmoa duela. «Buruz buru jokatu dudan partidarik onena da», aitortu du, neurketa bukatu berritan.
Ikusi gehiago
Zenozkoak partida borobila osatu du: sakez min egin, eskuinez asko gozatu, erritmo bizia ezarri, eta tantoak bukatzen ere asmatu du. 1-8 irabazten hasi da, eta arazo handirik gabe eutsi dio gero alde horri.
Jakak, berriz, ez du asmatu tantoa amaitzen. 3-13 zihoazenean hasi da hobetoxeago jokatzen, eta orduan berdindu da lehia. Berandu zen, ordea. 11-16 jartzea ere lortu du Jakak, baina Peio Etxeberria ez da kikildu, eta norgehiagoka borobildu du.
Ligaxkan, B multzoan arituko da Etxeberria, Lasorekin, Artolarekin eta Elordirekin batera. Lehen partida Lasoren kontra jokatuko du, Lekeition (Bizkaia), apirilaren 19an.
