Ordizia, ligako txapeldunorde hirugarrenez

Hirugarrenean ere ez da posible izan. Ampo Ordiziak 23-17 galdu zuen herenegun Santboianaren aurka Espainiako Ohorezko Mailako finala, Sant Boi de Llobregaten (Herrialde Katalanak). Iñigo Marotiasen taldeak ondo ekin zion finalari, zazpigarren minutuan Elliot Ryanek sartutako entseguari eta Valentin Cruzen transformazioari esker. Alta, Imanol Martinezen eta Javier Rojasen puntuekin, etxeko taldeak neurketa irauli zuen atsedenaldira iritsi aurretik: 13-7. Bigarren zatian, markagailuari buelta ematen ahalegindu zen euskal taldea, baina Santboianak ondo eutsi zion. Atzo, Udalak harrera egin zion taldeari.