Profesionaletan 14 urte eman eta gero —horietatik 10 World Tour mailan—, denboraldi amaieran erretiroa hartuko duela iragarri du Omar Fraile txirrindulariak (Ineos), sare sozialetan zabaldu duen bideo baten bidez: «Bizitzako momenturik onenean hartutako erabakia da. Beti izango ditut gogoan kirol honek eman dizkidan pertsonak eta momentuak».
Esker hitzak izan ditu bikotekidearentzat, bi semeentzat eta gurasoentzat. Hain zuzen ere, haiengandik urrun denbora gehiegi pasatu behar izateagatik erabaki du, besteak beste, erretiroa hartzea: «Txirrindularitzak gero eta gehiago eskatzen dizu: entrenamendu oso zehatzak, elikadura muturreraino zaintzea... Azkenaldian, batez ere bigarren semea jaio zenetik, gogorra egin zait etxetik kanpo hainbeste egun pasatzea ere». Gainera, argi du: «Asko asebetetzen nau agur hori munduko talderik onenean izateak: Ineosen. Izarrez betetako talde bat izan da beti, eta hasieratik etxean bezala hartu ninduten».
Ezusterik ezean, Espainiako Itzulia izango da korrituko duen azken lasterketa. «Ordu arte bete-betean lehiatu nahi dut, nire onena eman»
Frailek gogora ekarri du 3 urterekin ikasi zuela bizikletan ibiltzen, eta 8 urterekin hasi zela lehiatzen. Etxetik zetorkion zaletasun hori, aita bizikletan ibiltzen baitzen. «Oso ume bizia eta urduria nintzen, eta abiadurak eta gurpilek beti erakarri naute». Dena den, errepidean ez, mendiko bizikletan hasi zen. Baina hor ez zen nabarmendu, eta errepidean hasteko urratsa egin zuen. Seguros Bilbao izan zen haren lehen taldea, Xabi Artetxeren eskutik. «Haren izena nabarmendu nahiko nuke, baita Iker Camañorena ere. Iker eta biok herrikideak gara, Santurtzikoak, eta hark erakutsi zidan ofizioa. Errepideko txirrindularitzara egokitzen lagundu zidaten biek».
Urte hauetan Orbean, Caja Ruralen, Dimension Datan, Astanan eta Ineosen korritu du. Oso gogoan du 2015eko denboraldia. «Nire sasoi onena izan zen. Lehen bi garaipenak lortu nituen profesionaletan: Apeninoen Giroan eta Dunquerken». Urte hartan, gainera, lehen itzuli handian parte hartzeko aukera izan zuen: Espainiako Vueltan. «Ametsa izan zen, mendiko sailkapena ere irabazi nuelako, bai urte hartan eta bai hurrengoan».
Bi garaipen lortu ditu itzuli handietan: 2017an Giroan, eta 2018an Tourrean. Etxean irabaztea ere lortu du, 2017an Euskal Herriko Itzuliko etapa bat irabazi baitzuen. 2021ean Espainiako Txapeldun izan zen.
