France Football aldizkariak urriaren 28an jakinaraziko ditu Parisko Chatelet antzokian bere urteko sariak, eta Euskal Herriko bi futbol jokalari eta entrenatzaile bat daude horietako hiru jasotzeko hautagaien zerrendan: Nico Williams eta Unai Simon Athleticeko jokalariak, eta Xabi Alonso Bayer Leverkuseneko teknikaria.
Nico Williams Urrezko Baloia irabazteko aukera duten 38 futbolarien artean dago; Unai Simon, berriz, Yashin saria jasotzeko aukera duten atezainen multzoan. Bestalde, baliteke Xabi Alonso urteko entrenatzaile onena izendatua izatea. Lehen aldia da Athleticeko jokalari bat Urrezko Baloia eskuratzeko zerrendan dagoela.
Jokalari zuri-gorriek bi titulu eskuratu zituzten aurreko sasoian: Espainiako Kopa Athleticekin eta Eurokopa Espainiako selekzioarekin. Unai Simonek, gainera, Zamora saria jaso zuen, Lehen Mailan gol gutxien sartu dizkioten atezaina izan baitzen: 33 sartu zizkioten, jokatu zituen 36 partidetan.
Xabi Alonsok, berriz, estreinakoz egin zuen Bundesligako txapeldun Bayer Leverkusen, eta klubak garaikur horrekin zuen madarikazioa eten zuen hala. Gainera, partidarik galdu gabe lortu zuen hori. Alemaniako Kopa ere irabazi zuen, eta Europa ligako finalera iritsi. Atalantaren kontra galdu zuen final hura.
Urrezko Baloia bakarkako sari preziatuena da futbolarien artean. Adituen ustez, Jude Bellingham eta Vinicius Junior dira hura irabazteko hautagai nagusiak. Gaur zabaldutako zerrendan daude, besteak beste: Erling Haaland, Phil Foden, Martin Odegaard, Florian Wirtz, Kylian Mbappe, Lamine Yamal, Mats Hummels, Harry Kane, Lautaro Martinez, Declan Rice...
Unai Simonek, berriz, aurkari gogorrak ditu atezain onenaren saria lortzeko: Diogo Costa, Gianluca Donnarumma, Gregor Koel, Andrei Lunin, Mike Maignan, Giorgi Mamardaxvili, Emiliano Martinez, Yann Sommer eta Ronwen Williams.
Alonso, berriz, ondorengo entrenatzaile hauekin lehiatuko da: Carlo Ancelotti, Luis de la Fuente, Gian Piero Gasperini, Pep Guardiola eta Lionel Scalonirekin.
