Nerea Sorondok ez du parekorik izan

Nerea Sorondok aurrenekoz irabazi zuen atzo Donostiako Urrezko Kopa. Berako aizkolariak erakustaldia eman zuen Trinitate plazan. 11.34ko marka behar izan zuen 36 ontzako bost enborrak erdibitzeko, Irati Astondoa bigarrenak baino 2.05 gutxiago (13.39). Hirugarren Maika Ariztegi izan zen (14.22); laugarren, Itxaso Onsalo (14.22); eta, bosgarren, Xanta Sousa (18.53). Bilbon, berriz, buruz buruko Bizkaiko txapelketa jokatu zuten, eta Aitzol Atutxak ez zuen ezustekorik onartu. Dimoztarra hamabigarren aldiz izan zen txapeldun. Bigarren Julen Larrea izan zen, sei minutura, eta, hirugarren, Hodei Ezpeleta.