Miarritzeko emazteen errugbi taldeko artatzailea atxilotu zuten atzo goizean, sexu erasoengatik: taldeko lau jokalarik salaketak ezarri zituzten urte hasieran, eta heldu den irailean eginen dute epaiketa. Anartean, libre utzi dute 39 urteko kinesiterapeuta edo fisioterapeuta; kontrolpean atxikiko dute, eta ezinen du lanera itzuli.
Erasoak joan den irail eta urrian gertatutakoak dira. Serge Blanco emazteen taldea kudeatzen duen afizionatuen elkarteko presidenteak azaldu du «hainbat jokalari kexatu» zirela artatzailearen portaerengatik: «Berehala erabaki genuen Frantziako Errugbi Federazioarekin prozedura abiatzea».
Prozeduraren barnean, Baionako prokuradoreari seinalamendua helarazi zioten, eta urte hasieran lau salaketak jarri zituzten.
