Bi denboraldiren artean da Iñigo Iglesias motor gidaria (Errenteria, Gipuzkoa, 2002), eta bereziki arreta jartzen ari zaio joan den urtean hautsi zuen orkatila ondo osatzeari. Orain duen helburu nagusia hori bada ere, ortzi mugara begira jarrita dago jadanik eta denboraldi berria du begiz jota. Izan ere, Alemaniako IDM nazioarteko zirkuituan parte hartuko du berriro, talde berriarekin, Triumph Germany Supersport Racing, 600 cc-ko kategorian. Aurrez inoiz halako motorrekin ibili gabea da oraindik Iglesias, baina denboraldi berriari ekiteko gogoz dago.
Oraindik garaiz dabil lesiotik ondo osatzeko, maiatzean hasiko baitu denboraldi berria. Gainera, ondo ezagutzen ditu Alemaniako pistak; izan ere, aurrez denboraldi batez ibili zen txapelketa berean, 2023an, baina ez oraingo kategorian. 2021, 2022 eta 2024 denboraldiak Munduko Supersport 300 Txapelketan egin zituen. Iaz hirugarren geratu zen, eta motor handiagoetarako jauzia egingo du orain.
Lehen lasterketa maiatzaren 9 eta 11 artean izango da, Oscherslebenen, Alemania erdian. Iglesiasek oraindik ez du motor berria probatu, baina apirilean hasiko da 160 kiloko motor berriaren gainean probak egiten: «Apirilean hasiko gara prestaketekin, elektronika berria ikusteko, baina batez ere motor eta talde berria ezagutzeko; izan ere, dena berria da niretzat».
Ez dago urduri, «esperientziak irakatsi egiten duelako». Eta ilusioz dago: «Bare banago ere, hasteko gogo handia dut, kategoria berria delako, eta 300 cc-ko motorretik 765 cc-kora pasatuko naizelako. Aldaketa oso handia da; gidatzeko estilo berrira moldatu behar dut, askoz potentzia handiagoa duelako motorrak. Ilusioz beterik nago proiektu berriarekin hasteko».
150 zaldiko motorra
Nahiz eta oraindik motor berria ez duen probatu, adierazi du ezberdintasuna handia dela iazkoarekin alderatuta: «Azken bost urteetan gidatu dudan motorrak 50 zaldi ditu, eta 150 kiloko pisua. Orain erabiliko dudanak, Triumph Street Triple 765 batek hamar kilo eta 100 zaldi gehiago ditu. Pentsa zer-nolako aldea dagoen: praktikoki berdin pisatzen dute, baina potentzia ia hiru aldiz handiagoa du».
«Apirilean hasiko gara prestaketekin, elektronika berria ikusteko, baina batez ere motor eta talde berria ezagutzeko»
IÑIGO IGLESIASMotor gidaria
Horrek gidatzeko era asko aldatzen duela azaldu du, eta tarte batez gidatzeko eredu berrira moldatu beharko duela nabarmendu du: «Elektronikari dagokionez, askoz lan gehiago egin behar dira; kontu handiz ibili behar da elektronika arloan egiten diren aldaketekin, gasaren kontrolarekin... gauza asko dira».
Dena den, azken urteetan erabili duen motorra baino indartsuagoak ere probatu izan ditu. Urteak daramatza tarteka 600 cc-ko motor batekin entrenatzen; azaldu du aurten erabiliko duenaren antzekoa dela, baina Triumph motorra apirilean hasiko dela probatzen, «Alemanian ziurrenik». Horrez gain, motor hori erabili duen pilotu batzuekin hitz egin du, eta dagoeneko badaki zer alde on eta txar dituen.
Talde berriari buruz, esan du espero duela, motor fabrikatzaileen alorreko talde bat izanik, «eskatzen zaion mailan egotea», baita duen izenaren mailan egotea ere. «Haiekin bilera batean egona naiz, bazkaltzen ere bai, eta hitz egin izan dut. Dena oso ondo joan zen, baina lur hartu arte, batek daki». Iglesiasek nabarmendu du taldeak ibilbide ona duela, eta, teknikari berria Alemanian oso ezaguna bada ere, itxaron egin nahi du, hura ezagutu eta iritzia eman ahal izateko.
Lesioa atzean uztear
Azken hilabeteak Euskal Herrian eman ditu Iglesiasek, entrenatzen eta aurreko denboraldiaren amaieran izan zuen lesio gogorretik sendatzen, baina prozesua ondo doala ikusita, laster Almeriara (Espainia) joateko asmoa du, entrenatzera. Iazko azken lasterketan izan zuen erorikoa, urrian, Xerezen (Espainia), eta orkatila eta peronea hautsi zituen. Nahiz eta «espero baino motelago» doan, ondo ari da. Hala ere, azaldu duenez, gauza asko ohi moduan egin ditzake, korrika egin eta halako ariketak izan ezik.
Azkenaldian, Iglesiasek garrantzi handia eman die mugikortasunari eta oreka lantzeari, eta bizikletan ibiltzea ere gogoko duela nabarmendu du. Halere, lesioa dela eta, horrelako jardueretan ere arazoak ditu oraindik, baina gutxinaka gero eta gehiago egiteko asmoa du, benetan gogoko baitu; gainera, fisikoki ondo mantentzen laguntzen diola azaldu du, eta hori pilotu batentzat oso garrantzitsua dela.
