Espainiako Kopako bigarren kanporaketa jokatuko duten euskal taldeek badakite zer aurkariren aurka arituko diren. Gaur egin da zozketa, Espainiako Federazioak Las Rozasen daukan egoitzan, eta hauek dira euskal taldeei egokitu zaizkien aurkariak: Minera-Alaves, Conquense-Reala, Ceuta-Osasuna eta Barakaldo-Racing Ferrol.
Hurrengo kanporaketan lau euskal talde bakarrik arituko dira. Lehen Mailako hiru: Reala, Alaves eta Osasuna. Eta Espainiako Federazioaren Lehen Mailako bat: Barakaldo. Partida guztiak hurrengo astean jokatuko dira, abenduaren 3an 4an eta 5ean. Athletic ez da ariko, iazko garailea izateagatik ez baititu lehen bi kanporaketak jokatu beharko. Hurrengo fasean abiatuko du Kopako ibilbidea.
Alavesek eta Realak Espainiako Federazioaren Bigarren Mailako taldeen aurka jokatuko dute. Alaves Mineraren aurka arituko da. Murtziako (Espainia) taldeak beste euskal talde bat hartu zuen mendean aurreko kanporaketan. 0-5 irabazi zion Tudelanori. Realak, berriz, Cuencara (Espainia) joko du, Eivissa kaleratu duen Conquenseren aurka lehiatzeko.
Osasuna, berriz, Espainiako Federazioaren Lehen Mailako talde baten aurka lehiatuko da. Zozketak hala erabakita, Ceutari egingo dio bisita. Lehen kanporaketan Xerez hartu zuten mendean (1-0).
Lehen Mailan ari ez den euskal talde bakarra lehiatuko da Kopako bigarren kanporaketan: Barakaldo. Bizkaitarrek Bigarren Mailan ari den Racing Ferrol hartuko dute Lasesarren.
EMAKUMEZKOEK BADITUZTE ORDUTEGIAK
Emakumezkoen Espainiako Kopako final-zortzirenak atzo zozketatu ziren, eta gaur eman dute ordutegien berri. Reala eta Athletic ariko dira, eta biek igandez jokatuko dute, abenduaren 22an. 12:00etan jokatuko du Realak, Deportivoren aurka, Coruñan. Athleticek, berriz, 13:00etan jokatu du, Cacereñoren aurka, Caceresen.
