Kataluniak selekzio indartsuak osatu ditu larunbaterako

Kataluniako Futbol Federazioak «oso garrantzitsutzat» jo ditu larunbatean Bartzelonan euskal selekzioaren aurka jokatuko dituen bi neurketak. Horren erakusle argiena da bi selekzioetako hautatzaileek egindako deialdiak —Gerard Lopez eta Sergi Gonzalez dira gizonezkoena, eta Natalia Arroyo emakumezkoena—. Sona handiko jokalariak daude zerrendetan. Bartzelonako jokalariak dira nagusi bi deialdietan: gizonezkoetan zazpi daude, eta emakumezkoetan, bost. Espanyolek ere ordezkaritza zabala du, sei jokalari. Valentziak, berriz, lau ditu, guztiak emakumezkoak. Euskal taldeei dagokienez, Reala da ordezkariak dituen bakarra, hiru; hain zuzen ere, atzelariak guztiak: Alberto de la Bella, Paola Soldevila eta Nuria Mendoza.