Etxeko korrikalari batek lortu du garaipena gaur Ehunmiliak proban gizonezkoen lasterketan. Jon Aizpuru beasaindarra bere herrian nagusitu da, eta ez edonola, gainera. Marka berria ezarri du. 22 ordu, 21 minutu eta 54 segundo behar izan ditu. Aizpuruk bederatzi segundo hobetu du Javi Dominguezek 2017an ezarritako marka.
Ewa Majer poloniarrak irabazi du lasterketa emakumezkoetan. Horrek ere marka berria ezarri du, eta aurrekoa hemeretzi minututan hobetuz gainera. Majer 27 ordu, 41 minutu eta 47 segundotan helmugaratu da. Lasterketaren amaieran esan du "esperientzia izugarria" izan dela eta lasterketa zoragarria dela.
Errekorren eguna izan da gaurkoa. Izan ere, Goierriko Bi Handien lasterketako irabazleek ere marka berriak ezarri dituzte. Jon Azpiroz berastegiarrak 10:01:51ko marka ezarri du, Dani Agirrek 2016an ezarritakoa zortzi minutu hobetuta. Haren atzetik, bigarren izan da Goar Lopetegi (10:21:31), eta hirugarren Alvaro Ramos iruindarra (10:38:13).
Emakumezkoen lasterketan, Uxue Fraile donostiarra izan da garaile. 12:11:21eko marka ezarri du, eta lau minutuan gainditu du 2015ean Silvia Triguerosek egin zuen denbora. Bigarren emakumezkoa Elixabet Ursua izan da (13:51:43), eta hirugarrena, Amaia Otxoa (14:07:02).
Goierriko Bi Handien ibilbidea 88 kilometro luze da, eta 6.000 metroko desnibel positiboa du.
